Երևանի Կենտրոն և Նորք-Մարաշ վարչական շրջանի ընդհանուր իրավասության դատարանը այսօր, քննելով Վարդան Օսկանյանի ներկայացուցիչ, փաստաբան Տիգրան Աթանեսյանի ներկայացրած բողոքը, որով պահանջվում է վերացնել ՀՀ ԿԱ ԱԱԾ քննչական վարչության պետի տեղակալ Միքայել Համբարձումյանի կողմից 25.05.2012թ. քրեական գործ հարուցելու մասին որոշումը, մերժել է այն:
Այս մասին «Առաջին լրատվական»-ին հայտնեց Վարդան Օսկանյանի փաստաբան Տիգրան Աթանեսյանը: Թե ինչ հիմքով է մերժվել բողոքը՝ առայժմ պարզ չէ, դատարանը մերժման հիմքերը փաստաբանին կփոխանցի վաղը:
Նշենք, որ դատավոր Մնացական Մարտիրոսյանի նախագահությամբ դատական նիստը այսօր առավոտյան տեղի է ունեցել դռնփակ կարգով, ինչը նախագահող դատավորը պայմանավորել էր նրանով, որ բողոքն առնչվում է մինչդատական վարույթին: Հիշեցնենք, որ Վ. Օսկանյանը հիշյալ գործով վկա է, իսկ քրեական գործը հարուցվել է «փողերի լվացման» հատկանիշներով, որն առնչվում է «Սիվիլիթաս» հիմնադրամին: Բողոքում կողմը պահանջում է կարճել փողերի լվացման հատկանիշներով հարուցված և ԱԱԾ վարույթ ընդունված քրեական գործը` հանցադեպի կամ հանցակազմի բացակայության հիմքով: Ըստ Տիգրան Աթանեսյանի կողմից ներկայացված բողոքի՝ քրեական գործի հարուցմամբ խախտվել են իր վստահորդի իրավունքները:
