1993թ. այս օրը հայկական զինված ուժերը 40-օրյա համառ մարտերից հետո ազատագրեցին Աղդամ քաղաքը:
Շուշիի ազատագրումից հետո Ստեփանակերտի համար շարունակում էր սպառնալիք մնալ Աղդամը, որտեղից քաղաքը հրետակոծում էին 152մմ հեռահար հրանոթներով: Պարզ էր, որ քանի դեռ «գայլաորջը» չի վերացել, ԼՂՀ մայրաքաղաքն ու Ասկերանը դատապարտված են, և Շուշիից հետո գերխնդիրն էր Աղդամի ազատագրումը:
Դա համաբանակային գործողություն էր և բոլոր պաշտպանական շրջաններն էլ մասնակցեցին նրա ազատագրմանը: 1993թ. ամռանը ԼՂՀ ինքնապաշտպանության ուժերը մի քանի ուղղություններով սկսեցին Աղդամը շրջապատող հենակետերի լռեցման լայնածավալ գործողությունը: Ընդհանուր հարձակմանը նախորդեցին դիրքային իրավիճակի բարելավման դժվարին գործողություններ: Առաջնահերթ խնդիրը «Ուղտի մեջքի» գրավումն էր, առանց որի անհնար էր գրավել Աղդամը: Աղդամի ազատագրման ժամանակ ինքնապաշտպանական ուժերը փայլուն կատարեցին իրենց առաջադրանքը:
Երբ բարձունքներն ազատագրվեցին, քաղաքը պարզ երևաց: Թշնամին փորձեց օդից աջակցել ընկնող քաղաքի պաշտպանությանը, բայց ապարդյուն: «Գայլի որջն» այլևս գրավված էր, ու դիմացը պաշտպանություն էր կազմակերպվում: Հարձակումը սկսելուց 15 օր անց պաշտպանական բնագծերն արդեն կազմավորված էին:
