Նորվեգիայում այսօր հիշում են ահաբեկիչ Անդերս Բրեյվիկի կրկնակի ահաբեկչության (Օսլոյում և Ուտեյա կղզում) հետևանքով 77 զոհվածներին: Նրա գործողությունների հետևանքով տուժել էր ավելի քան 150 մարդ:
Առաջին պայթյունը որոտացել էր Օսլոյի կառավարական թաղամասում` տեղի ժամանակով 15.25-ին: Այդ ժամանակ զոհվել էր 8, վիրավորվել 98 մարդ: Մեծապես վնասվել էին հարակից շինությունները:
Ժամը 17.17-ին ոստիկանական համազգեստով Բրեյվիկը լաստանավով հասել էր Ուտեյա կղզի և կրակ բացել այնտեղ տեղակայված` Նորվեգիայի Աշխատանքային կուսակցության երիտասարդական ճամբարի ուղղությամբ, որի ժամանակ զոհվել էր 69 մարդ, հիմնականում մինչև 20 տարեկան երիտասարդներ, և տուժել էր 60 մարդ: Ժամը 18.34-ին ահաբեկիչն ինքնակամ հանձնվել էր ոստիկանություն:
Հարցաքննությունների և դատական գործընթացի ժամանակ, որն ավարտվեց հունիսին, ահաբեկիչը բազմիցս կրկնել էր, որ գործել է հանուն երկրի շահերի` ընդդեմ բազմամշակութայնության և Նորվեգիաի Աշխատանքային կուսակցության քաղաքականության, որը խրախուսում է անվերահսկելի միգրացիան: «Ես ճանաչում եմ հանցանքս, բայց ոչ` մեղքս»,- ասել էր Բրեյվիկը:
Itar-Tass-ի փոխանցմամբ` այսօր նորվեգացիները ծաղկեպսակներ կդնեն պայթյունի վայրում: Ողջ երկրում կանցկացվեն հիշատակի արարողություններ: Օսլոյի մայր տաճարում զոհվածների հիշատակի արարողությանը կմասնակցեն Նորվեգիայի թագավորական ընտանիքի անդամներն ու վարչապետը: Ավելի ուշ կուսակցության երիտասարդական թևի ներկայացուցիչները հիշատակի արարողություններ կանցկացնեն Ուտեյա կղզում: Այնտեղ կկազմակերպվի ընթրիք, որի ժամանակ թագաժառանգ Հոկոնը կհանդիպի զոհվածների հարազատներին և տուժածներին:
Երեկոյան նրանք, ովքեր Ուտեյայում կորցրել են մտերիմներին, կլինեն կղզում, և ջրում կհայտնվեն մոմեր ու ծաղիկներ:
Բրեյվիկի դատավճիռը կկայացվի օգոստոսի 24-ին:
Հունիսի վերջին Ուտեյայում զոհվածների հիշատակին հուշարձան է բացվել` ուղղանկյուն մի քար, որի վրա մարդկային ֆիգուր է փորագրված: Հուշարձաններ կտեղադրվեն բոլոր զոհվածների ծննդավայրերում:
