Ռուսաստանի նախագահ Վլադիմիր Պուտինը օրենք է ստորագրել ոչ կոմերցիոն կազմակերպությունների վերաբերյալ, ըստ որի՝ դրանք կգրանցվեն որպես «օտարերկրյա գործակալներ» այն դեպքում, եթե ֆինանսավորվեն դրսից, հաղորդում է RIA Novosti-ն:
Օրինագիծը Պետդուման ընդունել է հուլիսի 13-ին, իսկ հուլիսի 18-ին այն արժանացել է Դաշնային խորհրդի հավանությանը: Ոչ կոմերցիոն կազմակերպությունների մասին օրենքի համաձայն՝ արտասահմանից ֆինանսավորվող քաղաքական գործունեությամբ զբաղվող կազմակերպությունների համար կգործեն ստուգումների և հաշվետվության խիստ կանոններ:
Օրինագիծը սուր արձագանք է ստացել և բազմիցս քննադատվել է ոչ կոմերցիոն կազմակերպությունների ներկայացուցիչների և իրավապաշտպանների կողմից: Հուլիսի 18-ին Դաշնային խորհրդում քվեարկությունից երկու օր առաջ ՌԴ նախագահին կից մարդու իրավունքների խորհրդի ղեկավար Միխայիլ Ֆեդոտովը օրենքը չեղյալ հայտարարելու խնդրանքով դիմել էր խորհրդարանի վերին պալատի խոսնակին, քանի որ այս տարբերակով այն «բացահայտորեն հակասում է ռուսական իրավունքի հիմնարար ակունքներին»:
Օրինագծի հեղինակը Единая Россия կուսակցության խորհրդարանական խմբակցությունն է: Օրենքն ուժի մեջ կմտնի հրապարակումից 120 օր հետո:
