«Ժառանգություն» կուսակցության կենտրոնական գրասենյակը ահազանգ ստացավ Վանաձորից, ուր այս րոպեներին «Ժառանգության» ներկայացուցիչների մասնակցությամբ պետք է տեղի ունենար վրացական պետհամարանիշներով մեքենաների վարորդների բողոքի ոչ զանգվածային ակցիան: Սակայն ինչպես մեզ տեղեկացրեց Գյումրի-Վանաձոր ճանապարհին գտնվող ԱԺ «Ժառանգության» պատգամավոր Ստեփան Սաֆարյանը, ՀՀ ոստիկանության տարածաշրջանային վարչության աշխատակիցները խոչընդոտներ են հարուցում միջոցառման իրականացման ուղղությամբ: Այսպես, Ջաջուռ գյուղի մոտ արգելափակվել է Գյումրիից Վանաձոր ուղևորվող մի քանի տասնյակ մեքենաների բողոքի ավտոերթը: Խոչընդոտներ են հարուցվել նաև Տաշիրից և Ստեփանավանից Վանաձոր ուղևորված մեքենաների համար: Իսկ Վանաձորում գտնվող ԱԺ «Ժառանգության» պատգամավոր Արմեն Մարտիրոսյանը տեղեկացնում է, որ, ի հեճուկս վատ եղանակի (այս պահին այնտեղ ուժեղ ձյուն է տեղում), Ազնավուրի հրապարակում արդեն հավաքվել են 50-ից ավելի մեքենաներ, սակայն ոստիկանները, ոստիկանության տարածաշրջանային վարչության պետի և բարձրաստիճան այլ ոստիկանների գլխավորությամբ, առանձին-առանձին մոտենում են վարորդներին և ահաբեկում նրանց` ստիպելով հեռանալ հրապարակից: Սակայն վարորդները իրենց մեքենաները հրապարակից հեռացնելուց հետո հետիոտն վերադառնում են Ազնավուրի հրապարակ, և այս պահին այնտեղ հավաքվել են մոտ հարյուր քաղաքացիներ:
Ոստիկանության այս հակաօրինական և հակասահմանադրական գործողությունների վերաբերյալ ԱԺ «Ժառանգության» պատգամավոր Զարուհի Փոստանջյանը տեղեկացրել է ՄԻՊ գրասենյակի աշխատակիցներին, ապա փորձել է կապվել ՀՀ ոստիկանապետ Ալիկ Սարգսյանին, ինչը նրան չի հաջողվել: Ոստիկանապետի փոխարեն նրան պատասխանել է ոստիկանապետի գրասենյակի աշխատակից Պողոսյանը: Պատգամավորը պահանջել է փոխանցել ոստիկանապետին, որ անհապաղ միջոցներ ձեռնարկեն օրինազանց ոստիկաններին կարգի հրավիրելու նպատակով:
«Ժառանգություն» կուսակցությունը խստորեն դատապարտում է ոստիկանության հակասահմանադրական գործելաոճը և պահանջում ՀՀ ներքին գործերի նախարար Ալիկ Սարգսյանից անհապաղ միջոցներ ձեռնարկել իր ենթակաների ապօրինի գործողությունները դադարեցնելու ուղղությամբ, ինչպեսև վերջիններին պատասխանատվության կանչել:
«Ժառանգություն» կուսակցություն
