ՀՀ Ազգային ժողովի նախագահ Հովիկ Աբրահամյանը շնորհավորական ուղերձ է հղել Բակո Սահակյանին` ԼՂՀ նախագահ վերընտրվելու կապակցությամբ
Հարգելի պարոն Սահակյան,
ՀՀ Ազգային ժողովի և անձամբ իմ անունից ջերմորեն շնորհավորում եմ Ձեզ Լեռնային Ղարաբաղի Հանրապետության նախագահի բարձր պաշտոնում վերընտրվելու կապակցությամբ:
Ինքնիշխան Արցախում ժողովրդավարության չափանիշներին համապատասխան անցկացված հերթական նախագահական ընտրություններում Ձեր համոզիչ հաղթանակը Լեռնային Ղարաբաղի ժողովրդի կողմից Ձեր հանդեպ ցուցաբերած շարունակական վստահության վկայությունն է: Այն փաստում է, որ ԼՂՀ քաղաքացիները աջակցում են երկրի հզորացմանն ուղղված քաղաքականությանը, որը վարում են Լեռնային Ղարաբաղի իշխանությունները Ձեր գլխավորությամբ:
Վստահ եմ, որ վերընտրվելով պետության ղեկավարի պաշտոնում` Ձեր հետագա գործունեությամբ կշարունակեք ԼՂՀ պետականության ամրապնդմանն ու առաջընթացին ուղղված քայլերի իրականացումը:
Եվս մեկ անգամ շնորհավորելով Ձեզ` մաղթում եմ առողջություն և հետագա հաջողություններ Ձեր պատասխանատու պետական գործունեության մեջ, իսկ Արցախի ժողովրդին` խաղաղություն և բարեկեցություն:
Հովիկ Աբրահամյան
ՀՀ ԱԺ նախագահ
