Անգլիայում կաթի ֆերմաների մի քանի հարյուր սեփականատերեր արգելափակել են կաթի վերամշակման 3 գործարանների ճանապարհները` այդկերպ բողոքելով կաթի ցածր գնի դեմ: Այս մասին հաղորդում է SkyNews-ը:
Հրատարակության տվյալով` ֆերմերները տրակտորների օգնությամբ փակել են Սոմերսեթում` Robert Wiseman, Լեստերում` Arla և Լիդսում գտնվող ևս մի գործարան տանող ճանապարհները:
Կաթի ֆերմաների սեփականատերերը դժգոհում են կաթի գնից, որը 1 լիտրի դիմաց դարձել է 2 ֆունտ-սթեռլինգ: Հենց այդքան են նրանք ստանում գործարաններից:
Շատերը մտավախություն ունեն, որ նման քաղաքականությունը նրանց կստիպի փակել բիզնեսը, քանի որ կաթն ավելի էժան է, քան դրա արտադրության վրա կատարված ծախսերը:
The Guardian-ի տվյալով` Սոմերսեթում գործարանի մոտ հավաքվել է շուրջ 400 մարդ, որոնք գործարան տանող ճանապարհը փակել են 100 տրակտորով:
Միևնույն ժամանակ, Լիդսում հավաքվել է 600-700 ցուցարար:
Սա ֆերմերների առաջին բողոքի ակցիան չէ. 2 շաբաթ առաջ ֆերմերները սպառնում էին 5000 լիտր կաթ թափել Եվրախորհրդարանի առաջ` այդկերպ բողոքելով արտադրանքի ցածր գնի դեմ: