«Ցանկացած երկիր ամեն օր հանդիպում է պրոբլեմների, մարտահրավերների՝ լինեն դրանք արտաքին քաղաքականության մեջ, թե ներքաղաքական կյանքում»,- այսօր լրագրողների հանդիպմանը նշեց քաղաքագետ Ստեփան Գրիգորյանը։
Խոսելով ՀԱՊԿ-ից, որի անդամ է ՀՀ-ն, և որից դուրս է գալիս Ուզբեկստանը, քաղաքագետը նշեց․
«Սա մեզ հետաքրքրում է առաջին հերթին այն պատճառով, որ ՀԱՊԿ-ի անդամ է նաև ՀՀ-ն։ ՀԱՊԿ-ը ունի ընդամենը 7 անդամ, և ահա Ուզբեկստանն էլ դուրս է գալիս։ Անշուշտ, Ուզբեկստանի համար ՀԱՊԿ-ից դուրս գալու շատ պատճառներ կային։ Մեկը այն է, որ ՆԱՏՕ-ն և ԱՄՆ-ը հայտարարեցին, թե մինչ 2014թ․ ավարտը պետք է դուրս բերեն զորքերը Աֆղանստաից և որոշեցին, որ դրանք կտեղավորեն Կենտրոնական Ասիայում։ Ահա պարզ է՝ Ուզբեկստանը ցանկանում է, որ այդ ռազմակայանի մի մասը իր երկրում տեղավորվի։ Ուզբեկստանը հասկացավ, որ ՀԱՊԿ-ը կապանք է այս հարցում, ու որոշեց դուրս գալ, որ չխանգարի»։
Թե ինչ մարտահրավեր կարող է սա հանդիսանալ Հայաստանի համար՝ քաղաքագետը նշեց․
«Հայաստանի համար մարտահրավեր է այն, որ մենք պետք է հասկանանք՝ ՀԱՊԿ-ը չի կարող լինել մեր անվտանգության գլխավոր երաշխավորը։ Չեմ կարծում, թե կտրուկ քայլեր պետք է անի Հայաստանը, բայց պետք է խնդիրը քննարկել, նյուանսները պետք է հասկանալ։ Ուզբեկստանի դուրս գալը ևս մեկ անգամ ապացուցեց, որ ՀԱՊԿ-ը չի կարող ապահովել100%-ոց անվտանգություն»։
Լուսանկարը՝ PanARMENIAN Photo-ի
