Եվրամիության արտաքին քաղաքականության հարցերով ներկայացուցիչ Քեթրին Էշթոնը չի ասել, թե ԵՄ-ն չի ճանաչում ղարաբաղյան ընտրությունների արդյունքները. նա ընդամենը հայտարարել է, որ Եվրոպական միությունը չի ճանաչում սահմանադրական և իրավական շրջանակները, որոնցում ընթացել են հուլիսի 19-ի ԼՂՀ նախագահական ընտրությունները: Այսօր տեղի ունեցած մամուլի ասուլիսի ժամանակ այս մասին ասաց քաղաքագետ Ալեքսանդր Իսկանդարյանը:
«Որքան ես եմ հիշում, նման հայտարարություն առաջին անգամ է արվում»,- նկատեց նա:
Անդրադառնալով Վրաստանի ԱԳՆ հայտարարությանը, թե` այդ երկիրը չի ճանաչում ԼՂՀ նախագահական ընտրությունները, Ալեքսանդր Իսկանդարյնաը նկատեց, որ նմանօրինակ հայտարարությանը պետք է ըմբռնումով մոտենալ: «Վրաստանը Հարավային Օսիայի և Աբխազիայի հարց ունի, և նրա այսօրինակ հայտարարությունը լրիվ հասկանալի է»,- ասաց քաղաքագետը:
Հիշեցնենք՝ Վրաստանի ԱԳՆ-ն հայտարարել է, որ Վրաստանը չի ճանաչում Լեռնային Ղարաբաղում անցկացված նախագահական ընտրությունները: Վրաստանի ԱԳՆ-ն հաստատել է, որ միանշանակորեն աջակցում է Ադրբեջանի տարածքային ամբողջականությանն ու ինքնիշխանությանը:
Լուսանկարը՝ PanARMENIAN Photo-ի
