Հուլիսի 18-ին Դամասկոսում ահաբեկչության հետևանքով զոհված՝ երկրի պաշտպանության նախարար Դաուդ Ռաջիհանի, նրա տեղակալ, Բաշար ալ-Ասադի փեսա Ասեֆ Շաուկատի, ներքին գործերի նախարար Մուհամմեդ ալ-Շաարի, պաշտպանության նախկին նախարար Հասան Ալ-Թուրքմանի հրաժեշտի արարողությունը տեղի է ունենալու հուլիսի 20-ին` ուրբաթ օրը: Այս մասին հաղորդել է Agence France-Presse-ը` վկայակոչելով տեղեկատվական աղբյուրը:
Այս տեղեկատվության համաձայն` Դամասկոսում հոգեհանգստի արարողությունից հետո զոհվածների մարմինները կտեղափոխվեն իրենց հարազատ քաղաքներ: Դեռևս հայտնի չէ, թե արդյոք երկրի նախագահ Բաշար ալ-Ասադը ներկա է լինելու արարողությունը:
Նախագահի փեսա` պաշտպանության նախարարի տեղակալ Ասեֆ Շաուկատը թաղվելու է Տարտուսում: Հրաժեշտի արարողությանը ներկա է լինելու Շաուկատի այրին` Բուշրան և Բաշար ալ-Ասադի մայրը` Անիսան:
Սպանված պաշտպանության նախարարը հողին է հանձնվելու Մաալուլայում:
Ենթադրվում է, որ Հասան ալ-Թուրքմանիի մարմինը տարվելու է Հալեպ:
Ինչպես ավելի վաղ հաղորդվել էր, հավաստի տեղեկատվություն չկա, թե ներկա պահին որտեղ է Սիրիայի նախագահը և նրա ընտանիքը:
