Հայաստանի Կենտրոնական ընտրական հանձնաժողովի 5 հոգանոց պատվիրակությունը դիտորդական առաքելություն է իրականացնում Արցախի նախագահական ընտրություններում:
Հանձնաժողովի նախագահ Տիգրան Մուկուչյանը «Առաջին լրատվական»-ի հետ զրույցում նշեց, որ այսօր ամբողջ օրը շրջայց են կատարել ընտրատեղամասերում և ոչ մի խախտում չեն արձանագրել: Նա նաև նշեց, որ տեղյակ չէ նախագահի թեկնածու Վիտալի Բալասանյանի վստահված անձնաց արձնագրած խախտումների մասին:
«Ընտրական գործընթացը կազմակերպվել և անցկացվում է Ընտրական օրենսգրքի պահանջների համաձայն: Պահպանվում էին ընտրական իրավահարաբերությունների համար սահմանված բոլոր սկզբունքները, գործընթացը կազմակերպված էր բաց, թափանցիկ և հրապարակային:
Թեկնածուների վստահված անձինք փաստեցին, որ օրվա ընթացքում իրենք չեն նկատել թերություններ ու խախտումներ, որոնց վերաբերյալ կցանկանային տեղյակ պահել»,- ասաց Մուկուչյանը:
Հարցին, թե ինչ ընդհանրություններ կան Արցախում և Հայաստանում անցկացվող ընտրությունների միջև, Մուկուչյանը պատասխանեց, որ ինքը՝ որպես ՀՀ ԿԸՀ-ի նախագահ, կոռեկտ չի համարում զուգահեռներ անցկացնելը: <Հայաստանում անցկացված ընտրությունների վերաբերյալ ես բազմաթիվ անգամներ առիթ ունեցել եմ իմ տեսակետը ներկայացնելու: Հայաստանի Ազգային ժողովի անցած ընտրությունները կազմակերպվեցին և անցկացվեցին Ընտրական օրենսգրքին համապատասխան>,- ասաց Մուկուչյանը:
