Արարատի և Վայոց ձորի մարզերի ընդհանուր իրավասության դատարանի առջև այսօր կրկին ցույց էին կազմակերպել ամուսնու և սկեսրոջ կողմից դաժանաբար ծեծված Մարիամ Գևորգյանի գործով հերթական դատավարության առնչությամբ:
Խոշտանգված հարսին աջակցություն ցուցաբերող անձինք դատարանից շարունակում են պահանջել գործի հրապարակային քննություն և արդար դատաքննություն:
Հիշեցնենք, որ Արարատի և Վայոց ձորի ընդհանուր իրավասության դատարանը սկեսրոջ և ամուսնու կողմից Ռուսաստանի Դաշնությունում բռնությունների ենթարկված Մարիամ Գևորգյանի գործով դատավարությունը, որով մեղադրյալի աթոռին է սկեսուր Հայկանուշ Միքայելյանը, շարունակում է անցկացնել դռնփակ պայմաններում: Դատարանին նման միջնորդություն են ներկայացրել Մարիամ Գևորգյանի ամուսնու առաջին կինը` Մելինե Բայաթյանը, և սկեսուրը՝ Հայկանուշ Միքայելյանը: Իսկ տուժած հարսը վստահ է, որ դռնփակ դատավարության պայմաններում արդար դատաքննություն չի իրականացվի, և մեղավորները կկարողանան խուսափել պատժից:
Ինչպես «Առաջին լրատվական»-ի հետ զրույցում նշեց Մարիամ Գևորգյանի փաստաբան Նոնա Գալստյանը, դատարանում այսօր դատական նիստը շարունակվել է սովորական ընթացակարգով: Նրա խոսքով՝ դատարանում արդեն հարցաքննվել են դատակոչված գրեթե բոլոր վկաները: Մնացած մի քանի վկաների հարցաքննությունից հետո դատարանը կանցնի ամբաստանյալի հարցաքննությանը, որին էլ կհաջորդի գործով առկա ապացույցների հետազոտման փուլը: Իսկ առայժմ փաստաբանը չի ցանկանում խոսել դատարանի որդեգրած մոտեցման մասին. խոսքը վերաբերում է դատարանի կողմնապահությանը կամ անկողմնակալությանը:
Նշենք, որ ինչպես ինքը՝ տուժած հարսն է պատմում, սկեսուրը՝ Հայկանուշ Միքայելյանը, իրեն խոշտանգումների է ենթարկել որդու` Դավիթ Զիրոյանի հետ: Գևորգյանը Զիրոյանի հետ ամուսնացել է 2009 թվականի նոյեմբերին, նույն տարվա դեկտեմբերին տեղափոխվել է Սանկտ Պետերբուրգ, որտեղ նրան 10 ամսվա ընթացքում պարբերաբար ծեծի և կտտանքների են ենթարկել: Երևան վերադառնալուց հետո Գևորգյանը դիմել է ոստիկանություն:
Ամուսնուն մեղադրանք է առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծի» հոդվածներով, որի համաձայն՝ նրան կարող էին դատապարտել մինչև 3 տարվա ազատազրկման: Դատարանի որոշմամբ` Զիրոյանն ազատ է արձակվել Հայաստանի Հանրապետության 20-ամյակի կապակցությամբ ՀՀ նախագահի կողմից հայտարարված համաներմամբ:
Հայկանուշ Միքայելյանի դեմ առաջադրվել է մեղադրանք Քրեական օրենսգրքի 113 («Միջին ծանրության վնասվածքներ հասցնել») և 119 («Խոշտանգում») հոդվածներով: