Կատաղի մարտեր են ընթանում Սիրիայի մայրաքաղաքի Իխլաս թաղամասում, որտեղ գտնվում է Սիրիայի նախարարների խորհրդի շենքը: Այս մասին հաղորդում է Reuters-ը՝ վկայակոչելով ականատեսներին: Կառավարական շենքերի համալիրից բացի` նույն թաղամասում են գտնվում Դամասկոսի համալսարանի որոշ մասնաշենքեր: Իխլաս թաղամասից մինչև Կասյուն լեռան նախագահական պալատ մոտ 3 կմ է:
Կեսօրին փոխհրաձգությունները վերսկսվել են մայրաքաղաքի ծայրամասերում՝ Կաբունում, Կադամում և Թադամունում: Հաջր Ալ-Ասուադում զինյալներն այրել են ոստիկանական բաժանմունքը, իսկ վաղ առավոտյան փորձել են գրավել Մազզե փողոցի վրա գտնվող կառավարական շենքերից մեկը: Ականատեսների վկայությամբ՝ Դամասկոսի երկնքում մշտապես ուղղաթիռներ են պտտվում: Նրանք հայտնում են, որ բնակիչները փախչելու տեղ չունեն, քանի որ ամբողջ քաղաքով մեկ կրակոցներ են հնչում:
Սիրիայի կառավարական ուժերի հրամանատարությունը քաղաքացիական բնակչությանը 48 ժամ է հատկացրել` ապաստամբների գրաված շրջանները լքելու համար: Ինչպես հաղորդում է Agence France-Presse-ը, բնակիչները պետք է այդ թաղամասերից դուրս գան մինչև ուրբաթ երեկո, երբ ամբողջ իսլամական աշխարհում սկսվի Ռամադանը: Դամասկոսից արդեն դուրս եկած բնակիչների թիվը գերազանցում է մի քանի հազարը: