Վաշինգտոնը Սիրիայում իրականացված ահաբեկչության պատասխանատվությունը դրել է Բաշար Ալ-Ասադի վրա,- հաղորդում է ITAR-TASS-ը: Մեկնաբանելով կատարվածը՝ Սպիտակ տան պաշտոնական ներկայացուցիչ Ջեյ Քարնին հայտարարել է՝ «հենց Սիրիայի նախագահի կողմից սեփական ժողովրդի դեմ շարունակվող արշավի պատճառով է, որ մենք ականատես ենք լինում գնալով ավելի վատացող մի իրավիճակի»: «Կարծում եմ, չորեքշաբթի տեղի ունեցած միջադեպը (խոսքը ահաբեկչության մասին է.- 1in.am) հստակ ցույց է տալիս, որ Ասադը կորցնում է վերահսկողությունը, որ բռնությունն ուժեղանում է, և ոչ թե թուլանում»,- ասել է նա: Քարնիի խոսքերով՝ եթե Ասադը շարունակի մնա իշխանության գլուխ, «երկրում ավելի շատ բռնություն ու քաոս կտիրի»:
ԱՄՆ պետքարտուղարության պաշտոնական ներկայացուցիչ Պատրիկ Վենտրելը, մեկնաբանելով երեկվա ահաբեկչությունը , ուշադրություն է հրավիրել այն հանգամանքի վրա, որ զոհվածները և վիրավորները եղել են «Ասադի վարչակարգի կողմից սեփական ժողովրդի նկատմամբ իրականացվող ճնշումների արշավի հիմնական կառուցողները»: Պատասխանելով այն հարցին՝ արդյոք կարելի՞ է Դամասկոսի ահաբեկչությունը համարել «հակամարտության մեջ շրջադարձային կետ», Վենտրելը հայտարարել է. «Մենք ենթադրում ենք, որ ընդդիմությունը, անկասկած, հաջողությունների է հասնում»: Ընդ որում, նա խոստովանել է, որ ահաբեկչությունից հետո ԱՄՆ-ը արդեն կապ է հաստատել ընդդիմության հետ:
Հիշեցնենք. երեկ տեղի ունեցած ահաբեկչության հետևանքով զոհվել կամ վիրավորվել են երկրի մի շարք առանցքային պաշտոնյաներ:
