Քիչ առաջ կառավարության շենքի մոտ իրենց որդիների մահվան ցավը միմյանց հետ կիսող մայրերը կարողացան մուտք գործել կառավարության շենք: Այս պահին նրանք կառավարության շենքում աղաղակելով, բղավելով, աղերսելով` կառավարության նիստին ներկա անդամներից պահանջում են լսել իրենց, պահանջում են բացահայտել բանակում խաղաղ պայմաններում սպանված իրենց որդիների մարդասպաններին:
«Առաջին լրատվական»-ի հետ զրույցում 2007 թվականին բանակում սպանված Տիգրան Օհանջանյանի հայրը` Սուրեն Օհանջանյանը, ասաց` ինչքա՞ն կարելի է գալ կառավարության շենքի մոտ և անարդյունք տուն վերադառնալ:
Ըստ նրա` կառավարության շենք մտնելը ինքնանպատակ չէ` նրանք ցանկանում են իրենց ցավը, պահանջը լսելի դարձնել:
«Մենք ի՞նչ անենք` տեղ չկա, ո՞ւր գնանք, ի՞նչ անենք, մենք հո ճո՞րտ չենք: Ինչո՞ւ ուշադրություն չեն դարձնում այս ամենին»,- նշեց Սուրեն Օհանջանյանը:
Այս պահին մի քանի որդեկորույս մայրեր մտել են կառավարության շենք, իսկ մյուսները չեն հասցրել մտնել:
Լուսանկարները՝ PanARMENIAN Photo-ի
