Այսօր՝ հուլիսի 18-ին, ինքնասպանություն է տեղի ունեցել Երևանում: Ժամը 13.50-ի սահմաններում մի երիտասարդ Դավիթաշենի կամրջից ցած է նետվել:
Ինչպես դեպքի վայրից News.armenia.com-ին հայտնել է ֆոտոլրագրող Գագիկ Շամշյանը, դեպքի վայր է ժամանել Ոստիկանության Մաշտոցի բաժնի Դավիթաշենի բաժանմունքի օպերատիվ խումբը՝ Ոստիկանության Դավիթաշենի բաժանմունքի պետ Հրաչ Բաբայանի գլխավորությամբ:
Տեղում են եղել նաև դատական բժիշկը և դիահերձարանի աշխատակիցները:
Արդեն դեպքի վայր են ժամանել Ոստիկանության քննչական գլխավոր վարչության Մաշտոցի քննչական բաժնի հերթապահ խումբը՝ ավագ քննիչ Հարութ Խեդոյանի գլխավորությամբ:
Ոստիկանության Դավթաշենի բաժանմունքի աշխատակիցները պարզել են, որ ինքնասպանություն գործած երիտասարդը Երևանի բնակիչ 31-ամյա Տ. Մինասյանն է:
Հավաքվածները ֆոտոլրագրողին պատմել են, որ ինքնասպանություն գործածի հայրը հանրապետությունում հայտնի բժիշկ է:
Հավաքվածները Գ. Շամշյանին նաև պատմել են, որ նրա մայրը նույնպես հայտնի բժիշկ էր, և ընդհանուր առմամբ նրանց ընտանիքը ապահովված էր: Բացի այդ, երիտասարդը որոշակի հոգեկան խնդիրներ է ունեցել և մեկ տարի առաջ հաճախել է հոգեբանի մոտ:
Գ. Շամշյանը հայտնել է, որ Ոստիկանության Մաշտոցի բաժնի օպերատիվ-քննչական խումբը Դավիթաշենի կամրջից մոտ 800 մետր հեռավորության վրա՝ Արամ Խաչատրյան-Շիրվանզադե փողոցների խաչմերուկից դեպի Դավիթաշենի կամուրջ տանող ճանապարհին հայտնաբերել է «Դեու Էսպերո» մակնիշի ավտոմեքենա, որը պատկանում է Տ. Մինասյանին: Մեքենայի բանալիները եղել են մեքենայի վրա:
Փաստի առթիվ Մաշտոցի քննչական բաժանմունքում նյութեր են պատրաստվում:
Լուսանկարները՝ Գագիկ Շամշյանի
