BBC-ի ռուսական ծառայության փոխանցմամբ՝ Թուրքիայի վարչապետ Ռեջեփ Էրդողանն այսօր այցելելու է Ռուսաստան: Նա Մոսկվայում ոչ հեշտ բանակցություններ է վարելու Ռուսաստանի նախագահ Վլադիմիր Պուտինի հետ:
Հանդիպման ժամանակ կողմերի ուշադրության կենտրոնում են լինելու Սիրիայում տիրող իրավիճակն ու երկկողմանի հարաբերությունների հարցը: Մասնավորապես, Էրդողանը մտադիր է Պուտինին համոզել վերանայել Սիրիայի հանդեպ Ռուսաստանի դիրքորոշումը և վետո չդնել Սիրիայի վերաբերյալ ՄԱԿ-ի նոր բանաձևի վրա: Բացի այդ, կողմերը քննարկելու են հունիսի 22-ին Սիրիայի կողմից Միջերկրական ծովում թուրքական ինքնաթիռի կործանման հարցը:
Պուտինն ու Էրդողանն ինքնաթիռային միջադեպի կապակցությամբ հեռախոսազրույց են ունեցել հունիսի 27-ին, որում համաձայնել են, որ պետք է մանրամասն ուսումնասիրվեն այդ միջադեպի դետալները: Երկուշաբթի Ռուսաստանի արտգործնախարար Սերգեյ Լավրովը հայտարարեց, որ Ռուսաստանը Թուրքիային է փոխանցել տեխնիկական վերահսկման միջոցների օգնությամբ թուրքական ինքնաթիռի կործանման վերաբերյալ ստացված տվյալները:
Բացի այդ, հանդիպման ժամանակ կողմերի ուշադրության կենտրոնում են լինելու էներգետիկ հարցերը: Դա, մասնավորապես, վերաբերում է Թուրքիայի տարածքային ջրերով անցնելիք ռուսական «Հարավային հոսք» գազատարի և Աքքույուում թուրքական առաջին ատոմակայանի կառուցման խնդիրներին:
Նշվում է, որ 2011 թվականին Ռուսաստանը Թուրքիային է մատակարարել մոտ 26 միլիարդ խորանարդ մետր գազ, և այդ ցուցանիշով Թուրքիան ռուսական գազամատակարարումների հարցում զբաղեցրել է երկրորդ տեղը (առաջին տեղում Գերմանիան է): «Հարավային հոսք» գազատարի կառուցումը մեկնարկելու է այս դեկտեմբերին:
Գազատարի առավելագույն տարեկան թողունակությունը կազմելու է 63 միլիարդ խորանարդ մետր: Գազատարի նախագիծը գնահատվում է 15.5 միլիարդ եվրո, որից 10 միլիարդը բաժին է ընկնում նրա ծովային հատվածին, իսկ 5.5 միլիարդ եվրոն՝ ցամաքային հատվածին:
Ինչ վերաբերում է Աքքույուի ատոմակայանի կառուցմանը, ապա այն պահանջում է մոտ 20 միլիարդ դոլարի ներդրում, ինչն աննախադեպ է թուրքական տնտեսության համար: Դրա կառուցման համաձայնագիրը ստորագրվել է 2010 թվականի մայիսի 12-ին: Ներկայումս ընթանում են այդ նախագծի նախապատրաստական աշխատանքների համաձայնեցումը: Ընդհանուր առմամբ, ատոմակայանն ունենալու է 4 էներգաբլոկ՝ 4800 մեգավատտ հզորությամբ (յուրաքանչյուր էներգաբլոկը՝ 1200 մեգավատտ հզորությամբ):
Պուտինի և Էրդողանի քննարկման թեմաների թվում ընդգրկվել են նաև առևտուրն ու զբոսաշրջությունը: Ռուսաստանը Թուրքիայի արտաքին առևտրի ոլորտում զբաղեցնում է երկրորդ տեղը՝ Գերմանիայից հետո: 2011 թվականին Ռուսաստանի և Թուրքիայի միջև ապրանքաշրջանառության ծավալը կազմել է 31.8 միլիարդ դոլար, ինչը 26 տոկոսով ավելի է՝ համեմատած 2010 թվականի հետ:
Այս տարվա հունվար-մայիս ամիսներին ապրանքաշրջանառության ծավալն էլ ավելի է աճել և կազմել 13.7 միլիարդ դոլար: 2011 թվականին ռուս ներդրողները Թուրքիայի տնտեսությունում ներդրել են 1.1 միլիարդ դոլար, ինչը գրեթե 10 անգամ ավելի է, քան՝ 2010 թվականին:
Թուրքիան առավել հայտնի վայրերից մեկն է ռուս զբոսաշրջիկների համար: 2011 թվականին Ռուսաստանից Թուրքիա է այցելել 3.5 միլիոն զբոսաշրջիկ, ինչը 10 տոկոսով գերազանցել է 2010 թվականի ցուցանիշը: Դրան զգալիորեն նպաստել է վիզային ռեժիմի դյուրացումը, ըստ էության՝ վերացումը: Այս տարվա հունվար-մայիս ամիսներին Թուրքիա ժամանած ռուս զբոսաշրջիկների թիվը եղել է մոտ 817,000:
Ռուսաստանն ու Թուրքիան պլանավորել են նաև իրականացնել նոր մասշտաբային նախագծեր, ինչը մասնավորապես վերաբերում է նորարարությունների ոլորտին: Երկու երկրներն օժտված են լավ պոտենցիալով տիեզերքի հետազոտման հարցում միմյանց հետ փոխգործակցելու համար:
Պուտինն ու Էրդողանը վերջին անգամ միմյանց հանդիպել են այս տարվա հունիսի 19-ին Մեքսիկայում տեղի ունեցած G-20-ի շրջանակներում:
