Գազով լցավորված փուչիկների անվտանգությունը ոչ մի կազմակերպություն չի վերահսկում և ոչ մի իրավական ակտով ոլորտը կարգավորված չէ: Սակայն, ինչպես «Առաջին լրատվական»-ին հայտնեց ԱԻՆ պետական հրդեհային և տեխնիկական անվտանգության տեսչության բաժնի պետ Սերգեյ Հայրապետյանը, արդեն կոնկրետ միջոցառումներ են ձեռնակվել և հրդեհային անվտանգության կանոններում նախապատրաստվել են փոփոխություններ, որպեսզի խնդիրը որոշ չափով կարգավորվի: Առաջարկությունները պետք է արդարադատության նախարարությունում գրանցվեն, իսկ թե երբ կլինի, պարզ չէ:
Ս.Հայրապետյանը նշեց, որ առաջարկել են սահմանել, որ փուչիկները պետք է լցավորվեն միայն ոչ պայթյունավտանգ հելիում գազով, լցավորումը պետք է կատարի համապատասխան հրանգավորում ստացած մարդը՝ սահմանված վայրերում: Նաև սահմանվելու է, թե միջոցառումների ժամանակ ինչպես պետք է տեղակայվեն, որ պայթյունի ժամանակ հրդեհ չառաջանա, իսկ պայթյունի ձայնից խուճապ չառաջանա, կամ առաջանալու դեպքում հրմշտոց չլինի:
«Սա այնքան էլ մեր հարցը չէ: Պայթյունը հրդեհ չի համարվում մեր օրենսդրությամբ, բայց քանի որ մարդիկ այրվածքներ ստացան, մենք զբաղվում ենք: Օրենսդրական դաշտը կարագավորման կարիք ունի նաև հրավառությունների առումով, և դրա համար էլ ենք առաջարկություններ ներկայացրել, որ հրդեհային անվտանգության մասով կարգավորենք դաշտը»,- ասաց Ս.Հայրապետյանը:
Օրենքով հրդեհային հետազոտություններ անցկացվում է ցանկացած օբյեկտում, բացի մի շարք օբյեկտներից՝ օրինակ՝ դիվանագիտական, պաշտպանական և այլն:
Ըստ Ս.Հայրապետյանի՝ հարցն այն է, որ այդ լցավորողների մեծ մասը տանն են լցավորում փուչիկները, կան մարդիկ, որ մեթանի տարրան տանում են գազանանոց, մանկական երկաթուղի և պատի տակ նստած փուչիկը փչելով վաճառում են, իսկ տեսչությունը դրանց ստուգելու իրավասու չէ, նաև տներում իրավունք չունի հետազոտություն իրականացնելու: Իրավաբանական անձի դեպքում հայտնաբերված խախտումները պատժվում են վարչական տույժերով, նույնիսկ աշխատանքի դադարեցումով և այլն:
Նա կոչ արեց քաղաքացիներին՝ իրենց երեխաների համար չգնել ոչ մասնագետների կողմից լցավորված, թեև էժան, բայց վտանագավոր փուչիկները. «Նորմալ խանութներում մի քիչ թանկ է, մարդիկ հելիումը արտասահմանից բալոններով ներկրում են, բայց եթե այն անգամ պայթում է, ոչ մի կրակ չի լինում: Իսկ հելիումի և մեթանի գնային տարբերությունը շատ մեծ է, ուստի ոչ մի անհատ փուչիկ վաճառող չի գնա ու հելիում գնի»:
