Այս տարի հունվար-հունիս ամիսներին օդային ճանապարհով («Զվարթնոց» և «Շիրակ» օդանավակայաններ) Հայաստան է ժամանել 346 հազ. 929 մարդ, իսկ մեկնել է 402 հազ. 848 մարդ: Բացասական սալդոն անցած 6 ամսում կազմել է 55 հազ. 919 մարդ:
Հիշեցնենք, որ տարվա առաջին 5 ամիսներին բացասական սալդոն 68 հազ. 772 մարդ էր: Մեկնող-ժամանողների տարբերության այս նվազումը պայմանավորված է հիմնականում ամառային արձակուրդների գործոնով, երբ արտերկիր մեկնած մեր հայրենակիցները վերադառնում են՝ իրենց արձակուրդն այստեղ անցկացնելու համար, ինչպես նաև այն հանգամանքով, որ արտագնա աշխատանքի մեկնողները հիմնականում գարնան ամիսներին են հեռանում Հայաստանից:
Նշենք, որ քաղավիացիայի հրապարակած տվյալների համաձայն, 2011 թ. հունվար-հունիսին օդային ճանապարհով ժամանել էր 322 հազ. 401 և մեկնել՝ 377 հազ. 584 մարդ: Բացասական սալդոն եղել էր 55 հազ. 183:
