Թուրքական Dünya Bülteni կայքի փոխանցմամբ՝ Թուրքիայում տեղի է ունեցել Պաշտպանական արդյունաբերության գործադիր կոմիտեի նիստը, որում նախագահել է վարչապետ Ռեջեփ Էրդողանը:
Նիստին մասնակցել են նաև Թուրքիայի զինված ուժերի գլխավոր շտաբի պետ, բանակի գեներալ Նեջդեթ Օզելը, Պաշտպանության նախարար Իսմեթ Յըլմազը և այլ բարձրաստիճան զինվորականներ:
Մոտ 4 ժամ տևած նիստի ժամանակ քննարկվել են պաշտպանական ոլորտին առնչվող նոր նախագծերի իրագործումն ու ընթացքի մեջ գտնվող նախագծերի իրագործման ընդլայնումը:
Նիստից հետո արված հայտարարությունում նշված է, որ նիստում որոշվել է սկսել արբանյակի արձակման կենտրոնի նախագծի իրագործում՝ տիեզերքից Թուրքիայի ավելի մեծ օգուտներ քաղելու նպատակով
Ինչ վերաբերում է մեծ հեռահարություն ունեցող զենիթա-հրթիռային համալիրների գնմանը, ապա որոշվել է շարունակել թեկնածու ընկերությունների հետ բանակցությունները: Նիստում որոշվել է զարգացնել Թուրքիայի ցամաքային, օդային ու ծովային պաշտպանական համակարգերը:
