Բավարիայի ոստիկանությունը ձերբակալել է 54-ամյա մի տղամարդու, որն ապամոնտաժել է ճանապարհային նշանները՝ դրանց պտուտակները հավաքելու համար: Այս մասին գրում է Muenchner Merkur-ը՝ հղում անելով ոստիկանության ներկայացուցիչ Ռուդոլֆ Ֆիշերին: Իրավապահները չարագործի տանը հայտնաբերել են մի քանի կիլոգրամ պտուտակներ ու մեխեր:
Տղամարդուն նկատել է վարորդներից մեկը, երբ նա փորձել է ապամոնտաժել հերթական ճանապարհային նշանը: Նկատելով մոտակա մեքենան՝ տղամարդը թաքնվել է, սակայն ավելի ուշ դուրս է եկել թաքստոցից՝ ավարտին հասցնելու սկսած գործը: Նրան հետևող վարորդը որոշել է ոստիկանություն զանգահարել:
Գերմանացին, որին մի քանի ամիս շարունակ ոստիկանությունը որոնել է, մինչ այդ ոչ մի իրավախախտում թույլ չի տվել: Դեռևս հատնի չէ` տղամարդը կպատժվի՞ պտուտակների նկատմամբ իր կրքի պատճառով, թե՞ ոչ: Հասցրած վնասի չափը, չնայած գողոնի ծավալին, աննշան է: Նա հավաքել է մի քանի կգ պտուտակ՝ 800 եվրո ընդհանուր արժեքով: Պտուտակներից բացի` նա իր հետ վերցրել է մի քանի ճանապարհային նշաններ:
Այս լուրն ամենից շատ ուրախացրել է տեղի շինդեպարտամենտի ղեկավար Պայտինգեր Ֆրանց Մուլտերերին, որը ստիպված էր լինում պարբերաբար փոխել ճանապարհային նշանները: Նրա խոսքով՝ ինքը ձեռնարկել էր նշանների ամրացման բոլոր հնարավոր տեխնիկական միջոցները, սակայն դրանք վաղ թե ուշ դարձյալ ապամոնտաժվել են:
Մուլտերերն ակնկալում է ստանալ բոլոր պտուտակները:
