Իտալիայի 74-ամյա վարչապետ Սիլվիո Բեռլուսկոնին կրկին հայտնվել է հերթական սեքս-սկանդալի մեջ: Այս անգամ Մարոկկոյում ծնված, ապա Իտալիա տեղափոխված 18-ամյա մոդել Ռուբին հայտարարել է, որ Իտալիայի վարչապետը իրեն վճարել է` մեկ գիշեր իր հետ անցկացնելու համար:
Ռուբին նշել է, որ եկել է Իտալիա` հաղորդավար եւ մոդել դառնալու, սակայն այդ բիզնես մտնելու համար սկսել է գնալ մասնավոր խնջույքների, որոնք կազմակերպել է Սիլվիո Բեռլուսկոնին: Նա, իբր, մտնում էր այն մոդելների շարքի մեջ, որոնք ծանոթ էին վարչապետին, եւ որոնց գործերով զբաղվում է շոու-բիզնեսում հայտնի գործակալ Լելե Մորան: Այս սկանդալը սկսվել է դեռ մայիսին, երբ իր հարեւանուհին դուրս է վռնդել իրեն տանից: Աղջիկը, հայտնվելով փողոցում, ձերբակալվել է ոստիկանության կողմից, եւ պարզվել է, որ նա կեցության իրավունք չունի: Հենց այդ ժամանակ մոդելը պատմել է իր կապերի մասին վարչապետի հետ:
Բեռլուսկոնին հերքում է այս լուրերը: Այս պատմության շինծու լինելու մասին են խոսել նաեւ Բեռլուսկոնիի կուսակցության մի շարք անդամներ:
Հիշեցնենք նաեւ, որ այս սկանդալն առաջինը չէ վարչապետի կյանքում: Նախկինում էլ մամուլում եղել են շատ հրապարակումներ նրա «արկածների» վերաբերյալ: