1 – Մուբարաքի ինքնահրաժարումից անմիջապես հետո՝ ԱՄՆ-ի նախագահ Օբաման դա բնութագրեց.- «Դեպի ժողովրդավարություն անցում», «փոփոխություն եւ առաջադիմություն» եւ … «ազատախոհության հաղթանակ»…
2 – Փոփոխությունների ու ժողովրդավարության ձգտող Եգիպտոսի ազատախոհները, սակայն, դեռ շարունակում են համախմբված մնալ «Ալթահրիր» հրապարակի պատվանդանների վրա եւ …պահանջատեր լինել Մուբարաքին փոխարինած Զինխորհրդից:
3 – Զինխորհուրդը լուծարել է Եգիպտոսի երկպալատ խորհրդարանները, առկախել երկրի Սահմանադրական օրենքի կիրարկումը ընդհուպ՝ մինչեւ սեպտեմբեր, երբ կայանալու են նոր ընտրություններ:
4 – Հետմուբարաքային փուլում՝ Զինխորհրդի իշխանախմբից ժողովրդական իշխանության անցնելու 8-ամսյա ինչպիսի՞ հոլովույթ է ապրելու փոփոխությունների տենչած Եգիպտոսի ժողովուրդը:
5-Անցումային կարճատեւ թէ երկարատեւ փուլից հետո (դեռ ժողովրդի արձագանքը մի կողմ թողած), ի՞նչ երաշխիքներով են օժտված լինելու Զինվորական խորհրդի այն հայտարարությունները, որոնց համաձայն՝ տեղի կունենան ժողովրդավարական ընտրություններ եւ կձեւավորվեն ժողովրդաընտիր կառավարություն-խորհրդարաններ:
6 – Եգիպտոսը, ինչ խոսք, միջազգային համբավ է վայելում նաեւ ու մանավանդ իր դերով ու դիրքով՝ տարածաշրջանի հաշւին ու հատկապես Իսրայելի նկատմամբ իր դիրքորոշմամբ, որն, պարզ է, վերջին 30 տարում համահունչ է եղել ԱՄՆ տարածաշրջանային քաղաքականությանը՝ այն է՝ Իսրայել պետության լիարժեք անվտանգությունը:
-ԱՀԱՎԱՍԻԿ.-
7 – Պատկերացնենք մի պահ Կահիրեի «Ալթահրիր» հրապարակը. հարյուր հազարավոր ցուցարարներ՝ պաղեստինյան իրավազուրկ ժողովրդի դատին ի պաշտպան ու Եգիպտոս-Իսրայել «Քեմփ Դեյվիդ» պայմանագիրը բեկանել պահանջող…
8 – Տվյալ դեպքում (որի հավանականությունը քիչ չէ), նույն Օբամայի բնութագրականները, թիվ 1.-ում արված, ինչո՞վ կփոխարինվեն, եթե ոչ՝ «հակաժողովրդավարներ», «ծայրահեղականներ» ու «տեռորիստներ»-ով…
– ՊԱՐԶՎՈՒՄ Է.-
9 – ԱՄՆ գերպետության ու առհասարակ հետնորդ եւրոկառույցների համար ազատախոհական գաղափարներն ու ազատատենչ ժողովուրդների ինքնորոշման սկզբունքների կիրառելիությունը հասունանում են ոչ թէ երկարուձիգ 30 տարիների «խաղաղ» պայմաններում, այլեւ, անհրաժեշտ են եւս որոշիչ հավելեալ 18 օրեր, որպեսզի իրենց վրայ խարանված ամոթի տեսարանները «քողարկեն» ժողովրդավարությո՛ւն, փոփոխությո՛ւն, ազատախոհությո՛ւն պիղատոսաբանություններով…
