Սիրիացի գեներալ մայոր Ադնան Սիլլուն , որը նախկինում պատասխանատու էր Սիրիայում քիմիական զենքի ստեղծման և զարգացման համար, հրապարակավ հայտարարել է, որ անցնում է ընդդիմության կողմը: Համապատասխան տեսնյութը տեղադրված է Youtube-ում:
Իր ուղերձում գեներալը հայտարարել է, որ միանում է ապստամբությանը և զբաղեցնում Սիրիայի ազատ բանակի Միացյալ հրամանատարության ղեկավարի պաշտոնը:
Մյուս կողմից Դամասկոսի հարավային ծայրամսում շարունակվում են մարտերը: Ինչպես հաղորդում է Reuters-ը, քաղաքի կենտրոնից մի քանի կիլոմետր հեռավորության վրա գտնվող Միդան թաղամասում մտցվել են բանակային ստորաբաժանումներ և զրահատեխնիկա: Կառավարական զորքերը փորձում են դուրս հանել ապստամբներին Միդանից և վերահսկողություն սահմանել այդ թաղամասի վրա:
Բախումներ են տեղի ունենում նաև Զահրա Ալ-Ջադիդա թաղամասում, որտեղից լսվում են կրակոցի ձայներ և պայթյուններ: Մայրաքաղաքի հարավային մասի երկնքում բարձրանում են ծխի սև սյուներ: Ականատեսների հաղորդմամբ՝ մի շարք շենքերի տանիքներին դիպուկահարներ են տեղակայված:
Միդանից հարավ գտնվող Նահր Աիշա արվարձանի բնակչները փորձում են հետ մղել կառավարական ուժերի հարձակումը. նրանք փողոցներում բարիկադներ են տեղադրել և թույլ չեն տալիս զորքերին շարժվել հյուսիս:
Դամասկոսում լայնածավալ մարտերը սկսվել են հուլիսի 16-ի գիշերը, երբ միանգամից մի քանի հարավային շրջաներում ապստամբները մի քանի համակարգված հարձակումներ գործեցին կառավարկան ուժերի անցակետերի վրա: Տեղի բնակիչների պնդմամբ՝ սա հակամարտության ամբողջ ընթացքում ամենաերկատարև մարտն է Դամասկոսում:
Al-Jazeera-ն ուղիղ հեռարձակում է միացրել Դամասկոսից:
