Հուլիսի 16-17-ը Ժնևում ՄԻ կոմիտեում պետք է լսվի քաղաքացիական և քաղաքական իրավունքների միջազգային դաշնագրի վերաբերյալ Հայաստանի զեկույցը: Զեկույցին զուգահեռ ներկայացվելու են նաև ստվերային զեկույցներ հասարակական կազմակերպությունների, այդ թվում՝ Հելսինկյան քաղաքացիական ասամբլեայի Վանաձորի գրասենյակի կողմից: Այս մասին «Առաջին լրատվական»-ին տեղեկացրեց ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը:
Ըստ նրա` կան նաև միջազգային կազմակերպություններ, որոնք ստվերային զեկույցներ կներկայացնեն, և այդ քննարկման ժամանակ պետք է Հայաստանը զեկուցի, թե ինչ է իրականացվել դաշնագրի կատարման օրենսդրության առումով, քանի որ հիմնականում օրենսդրությունն է ներկայացվում:
«Մենք ներկայացնելու ենք ոչ միայն օրենսդրության վերաբերյալ մեր գնահատականը, այլ նաև պրակտիկայի վերաբերյալ. այնտեղ և՛ ընտրությունները, և՛ բռնությունները, և՛ ազատությունները ներկայացված են լինելու, քննարկման արդյունքում պետք է լինեն նաև առաջարկներ, թե ինչ պետք է անի Հայաստանի իշխանությունը դաշնագրի դրույթներն իրականացնելու համար: Այդ հարցերը կքննարկվեն, որից հետո նախատեսվում են մի քանի հանդիպումներ նաև Հայաստանի ներկայացուցչի հետ` Շառլ Ազնավուրի հետ, որովհետև նախորդ քննարկումների ժամանակ Ազնավուրի դիրքորոշումների հետ կապված ունեինք մտահոգություններ»,- մանրամասնեց Արթուր Սաքունցը` հավելելով, որ ինքը ևս մասնակցելու է, ուստի կա ֆորմատ, որ հարցեր տալու հնարավորություն է լինելու, որոնք մեծ ուշադրության են արժանանում:
