Նկարիչ Գուստավ Կլիմտի կորած համարվող որմնանկարը հայտնաբերվել է Ավստրիայի բնակիչներից մեկի ավտոտնակում, հաղորդել է ավստրիական Kronen Zeitung թերթը:
Ինչպես գրել է թերթը, 170 սմ դիամետր ունեցող աշխատանքը զարդարել է Վիեննայի ստուդիան, որում նկարիչն ապրել և ստեղծագործել է 1883-1892թթ.: Մի քանի տարի առաջ շենքի վերանորոգման ժամանակ աշխատանքը կորել է:
Մինչ հայտնի պատկերասրահի սեփականատեր Ջոզեֆ Ռենցի հետ կտավի ներկայիս սեփականատիրոջ կապ հաստատելը արվեստաբանները կարծում էին, որ աշխատանքն ընդմիշտ է կորել:
Ռենցի խոսքերով` սեփականատերը ոչինչ չի կասկածել որմնանկարի իրական արժեքի մասին մինչև այն ժամանակ, երբ ավստրիական ԶԼՄ-ները սկսել են լուսաբանել տոնական միջոցառումները` նվիրված Գուստավ Կլիմտի 150 ամյակին:
Ռենցը նշել է, որ աշխատանքը գտնվում է լավ վիճակում և շուտով կներկայացվի լայն հասարակությանը:
Գուստավ Կլիմտն ավստրիացի նկարիչ է: Նրա նկարների հիմնական թեման կնոջ մարմինն է, գործերի մեծ մասն աչքի է ընկնում էրոտիզմով:
