Անգլիայի բանկը, որը Մեծ Բրիտանիայում իրականացնում է Կենտրոնական բանկի գործառույթներ, այսօր հայտարարել է վարկային ծառայությունների շուկայի ակտիվության խթանման բազմամիլիարդանոց ծրագրի մեկնարկի մասին: Այս մասին հայտնում է ITAR-TASS-ը:
Նոր սխեմային անցնելու առիթը 2008-ից ի վեր բանկերի կողմից իրավաբանական կամ ֆիզիկական անձանց վարկավորման ծավալների 16 տոկոսով անկումն է: Դա տեղի է ունեցել գլոբալ ֆինանսատնտեսական ճգնաժամի բացասական ֆոնի հետևանքով:
Համաձայն նոր սխեմայի, որը կաշխատի օգոստոսից սկսած, Անգլիայի բանկը կկարողանա ֆինանսական կառույցներին վարկեր տրամադրել 4 տարով` տարեկան 0.25 տոկոսով, այսինքն` զգալի ձեռնտու պայմաններով, քան ներքին շուկայում է, որպեսզի այս միջոցներն ուղղվեն բնակչության վարկավորման ակտիվացմանը:
Հիմնական նպատակը, որ իր առջև դրել է Անգլիայի բանկը, նպաստելն է, որ հիփոթեքային վարկեր տրամադրելիս միջին տոկոսադրույքը նվազեցվի: Վերջին տարում այն աճել է 0.5 տոկոսով:
