Չինաստանի պետական ԶԼՄ-ները նախազգուշացրել էին ԱՄՆ-ին, որ հարկավոր չէ սրել առճակատումը` ավելի շատ ուշադրություն դարձնելով Խաղաղ օվկիանոսում ռազմական ներկայությանը: Այս մասին հայտնում է BBC-ի ռուսական ծառայությունը:
«Սինխուա» պետական տեղեկատվական գործակալությունը հայտնել է, որ ԱՄՆ պետքարտուղար Հիլարի Քլինթոնը փորձել է Չինաստանը դիվանագիտական մեկուսացման ենթարկել իր ասիական շրջագայության ընթացքում, որն ավարտվել է նախօրեին:
ԶԼՄ-ները մեղադրել են Քլինթոնին թեկուզ շղարշավորված, սակայն Չինաստանին մշտական քննադատության ենթարկելու և Չինաստանի ու նրա հարևանների տարածքային վեճերի մեջ մտնելու անդադար փորձերի համար:
Անցած տարի ԱՄՆ-ը հայտարարել էր, որ կուժեղացնի իր ռազմական ներկայությունը Խաղաղ օվկիանոսում ու կամրապնդի իր կապերն ասիական գործընկերների հետ: Չինաստանի պաշտոնական իշխանությունները ԱՄՆ գործողություններին տվել էին զուսպ գնահատական, իսկ ահա պետական լրատվամիջոցները օգտագործում են համարձակ արտահայտություններ` ցույց տալով կողմերի միջև առկա ճեղքի մեծացումը:
