Մարդու իրավունքների եվրոպական դատարանը սկսել է Սյուզաննա Սարգսյանի սպանության գործով հարցուպատասխանը հայրենի կառավարության հետ: Բողոքը քննության է առնվել պաշտպանական կողմի՝ ամուսիններ Նարինե և Բագրատ Նալբանդյանների պաշտպան Սեդա Սաֆարյանի դիմումի համաձայն:
Բողոքում նշվել է, որ Հայաստանի Հանրապետության իրավապահ մարմիններում, դատական համակարգում խախտվել են Նալբանդյանների արդար դատաքննության, արդյունավետ պաշտպանության, խոշտանգումներից զերծ մնալու իրավունքները, նշվել է նաև անհիմն կերպով կալանքի տակ պահելու մասին: Հիշեցնենք, որ այս գործով տուժողը Նալբանդյանների անչափահաս դստեր ընկերուհին էր, իսկ ամբաստանյալները, որոնք արդեն դատապարտյալների կարգավիճակում են, Նարինե և Բագրատ Նալբանդյան ամուսինները:
Դեպքը տեղի էր ունեցել 8 տարի առաջ՝ 2004թ. մայիսի 30-ին՝ Վարդենիս քաղաքում: Համաձայն մեղադրական եզրակացության` Սյուզան Սարգսյանն այդ օրը գնացել էր համադասարանցու՝ Արևիկ Նալբանդյանի տուն և նրա մոր` Նարինե Նալբանդյանի հետ վիճել: Վերջինս իր տան խոհանոցում, վիճաբանության ընթացքում «Ջերմուկի» ապակե շշով մի քանի անգամ հարվածել էր անչափահաս, 16-ամյա Սյուզաննա Սարգսյանի դեմքին: Աղջնակը ստացած հարվածներից կորցրել էր գիտակցությունը: Տանտերերը մետաղալարով կապել էին Սյուզաննայի ձեռքերը, փակել բերանը և 5-6 ժամ թողել էին փակված խոհանոցում, սակայն աղջնակը այդ ժամանակ դեռ ողջ է եղել: Ըստ քրեական գործի նյութերի՝ ամուսինները, մի քանի ժամ սպասելուց հետո դեռևս չմահացած աղջկան կեսգիշերին քաշ տալով տարել և նետել էին իրենց տնից ոչ հեռու գտնվող մազութի հորը, որտեղ էլ Սյուզաննան մահացել էր:
Նարինե Նալբանդյանը ձերբակալվել էր հանցագործությունից մոտ 40 օր անց՝ հուլիսի 9-ին, պատմել եղելությունը, իսկ 2005-ի փետրվարի 4-ին Գեղարքունիքի մարզի առաջին ատյանի դատարանի դատավճռով Վարդենիսի բնակիչները՝ Նարինե Նալբանդյանը դատապարտվել էր 14 տարվա ազատազրկման, իսկ Բագրատ Նալբանդյանը՝ 9 տարվա:
Հիշեցնենք նաև, որ այն ժամանակ այս քրեական գործով հետաքրքրված էր նաև «Հելսինկյան ընկերակցությունը», որը կասկածի տակ էր դրել այդ սահմռկեցուցիչ հանցագործության փաստով հարուցված քրեական գործի նախաքննությունն ու դատաքննությունը: Ուստի ամբաստանյալների պաշտպանությունն ստանձնել էր կազմակերպության անդամ Սեդա Սաֆարյանը: Նրա պաշտպանյալներից Նարինե Նալբանդյանը դատարանում հայտնել էր, թե ինքնախոստովանական ցուցմունքներն իրենից բռնությամբ են կորզել:
