Ադրբեջանական Trend լրատվական գործակալության փոխանցմամբ՝ Թուրքիայում էներգետիկ բորսայի ստեղծումը հնարավորություն կտա երկրի ներսում կայունացնել էլեկտրաէներգիայի գները, ինչպես նաև կնպաստի ներկրվող ու արտահանվող էլեկտրաէներգիայի գների կարգավորմանը: Այս մասին հայտարարել է Թուրքիայի էլեկտրաէներգիայի առևտրի պետական ընկերության (TEİAŞ) ղեկավարներից Հաջի Դուրան Գյոքքայան:
Վերջինիս խոսքերով՝ Թուրքիայում էլեկտրաէներգիա արտադրելուց հետո դրանում կներկայացվեն էլեկտրաէներգիայի տվյալ ժամանակվա ռեալ գնի մասին տվյալներ, ինչի շնորհիվ արտադրողն ու սպառողը հստակ տեղեկատվություն կունենան էլեկտրաէներգիայի արտադրության ու գների մասին:
Նա հավելել է, որ առաջին փուլում բորսայում ներկայացված կլինեն միայն թուրքական ընկերությունները, էլեկտրաէներգիայի արտադրողներն ու սպառողները, իսկ ավելի ուշ դրանում կարող են ներգրավվել այն երկրները, որոնք մտնում են էլեկտրաէներգիայի հաղորդման եվրոպական ցանցի մեջ (European Network of Transmission System Operators for Electricity – ENTSO-E):
Հիշեցնենք, որ Թուրքիայի էներգետիկ բորսայի ստեղծման մասին համաձայնագիրը TEİAŞ-ի և Եվրոպական էներգետիկ բորսայի միջև կնքվել է հուլիսի 6-ին:
