Սևանից հավելյալ ջուր բաց թողնելու օրինագծի վերաբերյալ հայտարարությամբ հանդես կգանք: «Առաջին լրատվական»-ի հետ զրույցում խոսելով ԱԺ-ում առաջին ընթերցմամբ ընդունված օրինագծի շուրջ՝ ասաց «Էկոլուր» հասարակական դաշինքի ղեկավար Ինգա Զառաֆյանը:
Անդրադառնալով ՄԻՊ Կարեն Անդրեասյանի հայտարարությանը խնդրի վերաբերյալ` նա ասաց, որ ՄԻՊ-ի արձագանքը հիմնված էր օրեր առաջ անցկացված քննարկման վրա: Ըստ նրա` ՄԻՊ-ն ուշադրություն էր դարձրել բոլոր դիտարկումներին, որոնք արել էին բնապահպանները: «Մենք ասել էինք, որ Օրհուսի կոնվենցիան խախտված է: Հիմա Սևանում ենք, Գերարքունիքի համայնքներով ենք անցնում: Մենք կգանք և կխորհրդակցենք, թե ինչպես ենք ձևավորելու մեր հետագա քայլերն այս ուղղությամբ: Ես համարում եմ, որ այս օրինագիծն արդարացնելու հիմնավորումներն իրականությանը չեն համապատասխանում, իրենց ասածները չի նշանակում, որ համայնքները ջուր ունեն և կկարողանան ապահովել իրենց: Մենք պետք է խորհրդակցենք և տեսնենք, թե ինչ պատասխան հայտարարությամբ ենք հանդես գալու»,- նկատեց Ինգա Զառաֆյանը:
Հիշեցնենք, որ ՄԻՊ Կարեն Անդրեասյանը հայտարարությամբ էր հանդես եկել Սևանի մասին օրենսդրության փոփոխությունների վերաբերյալ:
Սույն թվականի հունիսի 15-ին ՀՀ կառավարությունը ներկայացրել և ՀՀ Ազգային ժողովը ընդունել էր օրենսդրական փոփոխությունների փաթեթ, որով նախատեսվում էր Սևանա լճից ջրի բացթողնման տարեկան ծավալը 170 միլիոն խմ-ի փոխարեն սահմանել 320 միլիոն խմ: Այս կապակցությամբ ՄԻ պաշտպանի գրասենյակում կազմակերպվել էր կլոր սեղան-քննարկում պետական մարմինների և մի շարք բնապահպանական հասարակական կազմակերպությունների ներկայացուցիչների մասնակցությամբ: Այդ քննարկման արդյունքում ձեռք բերած եզրակացությունները ՄԻՊ-ը ներառել էր իր հայտարարության մեջ՝ նշելով, որ կոչ են անում իրավասու բոլոր պետական մարմիններին որոշումների կայացման յուրաքանչյուր գործընթաց իրականացնել օրենքի անշեղ պահպանմամբ: Որպես օրենքի պահանջ հասարակության մասնակցության ապահովումն այս գործընթացներում իրականացնել հրապարակայնության, մատչելիության և թափանցիկության սկզբունքներին համապատասխան, ձևավորել քաղաքացիական հասարակության հետ արդյունավետ համագործակցության մշակույթ և հրատապ միջոցներ ձեռնարկել շրջակա միջավայրի վերաբերյալ տեղեկատվությունը հասարակության համար անմատչելի դարձնող որոշումները և գործողությունները բացառելու ուղղությամբ:
