Չնայած այն հանգամանքին, որ Սևանա լճի ջրի բարձրացումը մեծ անհանգստություններ է պատճառում իշխանական շրջանակներում, բնականաբար լճի առափնյա հատվածներում կառուցված իշխանավորների առանձնատների հետ կապված, Սևանա լճի մակարդակը շարունակում է բարձրանալ:
Ու թեև շատ բնապահպաններ այն համոզմունքին են, թե լճի մակարդակի բարձրացումը խոչընդոտվում է տարատեսակ միջոցներով` մինչև անգամ այն երաշտով արդարացնելով, 2010 թվականին լճի ջրի մակարդակի բարձրացման դինամիկայի համաձայն` շարունակվել է Սևանա լճի մակարդակի բարձրացման կայուն միտումը: Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների շարքում 2010 թվականի գերակա խնդիրների կատարման շրջանակներում` ուսումնասիրվել է նաև Սևանա լճի ջրի մակարդակի բարձրացումը:
ԲՆ տարեկան հաշվետվության համաձայն` եթե Արփա-Սևան թունելով լիճ տեղափոխվող ջրաքանակը 2008-ին կազմել է 178.4 մլն խմ, 2009-ին 203.8, ապա 2010 թվականին ջրաքանակը կազմել է 237 մլն.խմ: Իսկ ոռոգման նպատակով լճից բաց թողնվող ջրի չափաքանակը եթե 2008 թվականին կազմել է 303 մլն. խմ, իսկ 2009-ին 126.1, ապա 2010 թվականին կազմել է 157.2 մլն. խմ: Ինչևէ Սևանա լճի մակարդակը 2010-ի դեկտեմբերի 31-ի դրությամբ 2009 թվականի 1899.23 մետրի համեմատ բարձրացել է հասնելով 1899.70 մետրի: Հիշեցնենք, որ դեռ 2007-ին լճի մակարդակը 1898.79 մետր էր:
Ի դեպ անցյալ տարվա ընթացքում Սևանա լճի առափնյա տարածքներում ապամոնտաժվել են 1900.25 մ նիշից ցածր մակարդակի վրա գտնվող 78 շենք և շինություններ, այդ թվում` 24-ը` «Սևան» ազգային պարկի կողմից:
