«Առավոտ» թերթը ներկայացրել է ՀՀ զինվորական դատախազ Գևորգ Կոստանյանի պարզաբանումը Մարդու իրավունքների եվրոպական դատարանի կողմից փաստաբան Վահե Գրիգորյանի գործով կայացրած որոշման վերաբերյալ։
Զինդատախազը մասնավորապես նշել է, որ փաստաբան Վահե Գրիգորյանը ՄԻԵԴ–ին դիմել է 6 կետերով իրավունքների նախատեսված իրավունքների խախտման հարցով և դրա դիմաց պահանջել 128 400 եվրո։ «Բոլոր այդ հարցերի հետ կապված կառավարությունը Եվրոպական դատարանին ներկայացրել է սպառիչ առարկություններ։ Դրանց հիման վրա Եվրոպական դատարանը սկզբունքորեն անընդունելի է ճանաչել հայցի բոլոր կետերը՝ բացառությամբ մեկի։ Այլ կերպ ասած՝ Եվրոպական դատարանը համարել է, որ անձի ազատության և անձեռնմխելիության առումով (կոնվենցիայի 5–րդ հոդվածի 1, 3, 4, 5–րդ կետեր) պետությունը որևէ խախտում թույլ չի տվել։
Այսինքն՝ նրա ձերբակալումը, կալանավորումը, քրեական հետապնդման հարուցումը եղել են ՀՀ օրենսդրության և Եվրոպական կոնվենցիայի սահմաններում ու շրջանակներում։ Այդ պարագայում Եվրոպական դատարանն անընդունելի է համարել վերջինիս պահանջները և մերժել է։ Անընդունելի են համարվել նաև կոնվենցիայի 10–րդ հոդվածով, այսինքն՝ խոսքի ազատության ենթադրյալ խախտման վերաբերյալ Վահե Գրիգորյանի պնդումները, դատարանը համարել է, որ դրանք ընդհանրապես առնչություն չունեն խնդրո առարկայի հետ։
Այդպիսով՝ դատարանը հիմնավոր է համարել միայն մեկ փաստարկ։ Կոնվենցիայի 6–րդ հոդվածը սահմանում է, որ յուրաքանչյուր ոք ունի ողջամիտ ժամկետում արդար դատաքննության իրավունք։ Եվ այն հանգամանքը, որ այդ քրեական գործը քննվել է առնվազն 2005թ հունիսի 10–ից մինչև 2010թ սեպտեմբերի 10–ը, դատարանը այդ ժամանակահատվածը համարում է ողջամիտ ժամկետի խախտում։ Եվ միայն հենց այդ հիմքով ներկայացված 128 400 եվրոյի պահանջի դիմաց դատարանը հատկացրել է 2500 եվրո»,– պարզաբանել է Գևորգ Կոստանյանը։
