Ներկայումս ընտանեկան օրենսգրքով ամուսնության կնքման համար տարիքային չափանիշ է սահմանված` կանանց համար` 17, իսկ տղամարդկանց համար` 18 տարեկան տարիքի հասնելը: Սակայն մոտ ապագայում կանանց ամուսնությունը նույնպես կթույլատրվի 18 տարեկանից: Վաղը կառավարության նիստում նախատեսվում է հավանություն տալ «ՀՀ ընտանեկան օրենսգրքում փոփոխություն կատարելու մասին» ՀՀ օրենքի նախագծին:
Գործադիրի ներկայացուցիչներն այս փոփոխությունը հիմնավորում են գենդերային հավասարության խնդրով, այսինքն` և՛ կանանց, և՛ տղամարդկանց համար սահմանվում է միևնույն ամուսնական տարիքը:
Այս օրենքը չի տարածվելու այն ամուսնությունների վրա, որոնց պետական գրանցման համար ներկայացված դիմումները քաղաքացիական կացության ակտերի գրանցման մարմինների կողմից ստացվել են մինչև սույն օրենքի ուժի մեջ մտնելը:
