Յուրաքանչյուր վարչական շրջանում աղբահանության աշխատանքները կատարվում են բնակչության խտության համաձայն: «Առաջին լրատվական»-ի հետ զրույցում ասաց Երևանի քաղաքապետարանի հասարակայնության հետ կապերի և լրատվության բաժնի պետ Արթուր Գևորգյանը` խոսելով քաղաքում իրականացվող աղբահանության աշխատանքների իրականացման սկզբունքների շուրջ:
Ըստ նրա` կոնկրետ ասել, որ քաղաքում այսինչ վայրում կատարվում է օրական 2 կամ 3 անգամ աղբահանության աշխատանք, ճիշտ չի լինի ասել ամբողջ քաղաքի մասշտաբով: «Երևանի Կենտրոն վարչական շրջանում, եթե չեմ սխալվում, օրական չորս անգամ են իրականացնում աղբահանության աշխատանքներ»,- ասաց Արթուր Գևորգյանը:
Անդրադառնալով օրեր առաջ «Առաջին լրատվական» կայքում տեղադրված տեսանյութին, որտեղ երևում էին Արամ Խաչատրյան-Գյուլբենկյան խաչմերուկում աղբի կույտեր աղբամանից դուրս և հակասանիտարական վիճակ` ասաց, որ ամեն ինչ իր համեմատականն ունի: Նրա խոսքով` 2 տարի առաջ Արաբկիրը խոզանոց էր, այդ տարիների պատկերը և այսօրվա պատկերը համեմատելի չէ: Նա նաև հավելեց, որ նման իրավիճակը որևէ կերպ արդարացնել հնարավոր չէ, պետք է մաքրվի, բայց ասել, որ ոչինչ չի կատարվում, չի կարելի:
«Արաբկիր վարչական շրջանում կատարվող աղբահանության աշխատանքներն իսկապես գնահատելի են: Իսկապես նոր թաղապետի նշանակումից հետո բավականին տեսանելի ու շոշափելի արդյունքներ կան: Կարծում եմ` եթե բնակիչների հետ էլ փորձեք խոսել, փորձեք իրենց կարծիքն էլ հարցնել, վստահ եմ, որ մարդիկ կփաստեն, որ առաջընթաց կա: Արաբկիրի թաղապետարանը իր ղեկավարի անմիջական ղեկավարությամբ ամբողջ աշխատանքները բարեխղճորեն կազմակերպում է»,- մեկնաբանեց Արթուր Գևորգյանը` զուգահեռաբար նաև ասելով, որ այսօր իդեալական վիճակ չէ, ոչ ոք հակառակն ասել իրեն թույլ չի տա, առավել ևս, երբ մենք գործ ունենք գործող, զարգացող օրգանիզմի հետ, այդ օրգանիզմը միշտ էլ լուծում պահանջող խնդիրներ կունենա:
Նրա վստահեցմամբ` քաղաքապետարանը շարունակում է նոր մեխանիզմներ մշակել քաղաքը մաքուր պահելու համար, որոնցից մեկն այն է, որ փողոցները մաքրվելու են պոլիէթիլենային տոպրակներից:
Երևանի քաղաքապետարանի հասարակայնության հետ կապերի և լրատվության բաժնի պետի խոսքով` հասարակության շրջանում ևս պետք է ներմուծել քաղաքը մաքուր պահելու գիտակցությունը, որը պակաս կարևոր չէ:
