Թուրքական Anadolu գործակալության փոխանցմամբ՝ Թուրքիայի էներգետիկայի ու բնական պաշարների նախարար Թաներ Յըլդըզն այսօր հայատարարել է, որ Հյուսիսային Իրաքի քրդական ինքնավարությունից դեպի Թուրքիա նավթի ներկրմամբ զբաղվելու է մասնավոր սեկտորը:
Յըլդըզն անհրաժեշտ է համարել քրդական ինքնավարությունից նավթամթերքի ներկրումը՝ ընդգծելով, որ իրենք նույն հարցով պատրաստ են բանակցել Իրաքի կենտրոնական կառավարության հետ:
Ներկայումս Թուրքիան ձգտում է օգտվել Իրաքի կենտրոնական կառավարության ու Հյուսիսային Իրաքի քրդական ինքնավարության միջև առկա տարաձայնություններից և սկսել ավտոցիստեռներով ներկրել «քրդական նավթ»: Սկզբնական փուլում Թուրքիան նախատեսում է Հյուսիսային Իրաքից օրական ներկրել 15,000 բարել նավթ: Սակայն Թուրքիան չի պատրաստվում սահմանափակվել միայն այդքանով. նա անգամ պլանավորել է մինչև 2013 թվականը նոր նավթամուղ կառուցել դեպի Հյուսիսային Իրաք:
Սակայն պաշտոնական Բաղդադը հայտարարել է, որ պատժամիջոցներ է սահմանելու թուրքական այն ընկերությունների նկատմամբ, որոնք նավթագազային համաձայնագրեր կստորագրեն Հյուսիսային Իրաքի քրդական ինքնավարության հետ՝ առանց Իրաքի կենտրոնական կառավարության համապատասխան թույլտվության:
Ներկայումս Հյուսիսային Իրաքի քրդական ինքնավարության նավթային պաշարները կազմում են 45 միլիարդ բարել: Հյուսիսային Իրաքի քրդական ինքնավարությունում նավթի օրական արդյունահանումը հասել է 300,000 բարելի:
