Սառը պատերազմի ժամանակ ԱՄՆ-ը միջուկային մարտագլխիկներով հրթիռները պատրաստ էր պահում նախագահի հրամանից հետո՝ 3-4 րոպեի ընթացքում, արձակելու համար: Այս մասին գրում է The Washington Post-ը և հավելում, որ միջուկային պատերազմ սկսելու դեպքում աշխարհը 13 րոպեում կանհետանա:
Նույնիսկ սառը պատերազմից 20 տարի անց ԱՄՆ ռազմավարական ուժերի 1/3-ը, այդ թվում՝ գրեթե բոլոր երկրային և որոշ ծովային տեղակայման հրթիռները նախկինի պես բերված են մարտական պատրաստության: Պատճառն այն է, որ նույնն անում է Ռուսաստանը:
Նախագահ Օբաման մինչ նախագահի պաշտոնում ընտրվելը և լիազորությունների ստանձնումից հետո առաջարկել է Ռուսաստանի հետ բանակցել ցամաքային հրթիռները մարտական պատրաստությունից դուրս բերելու հարցի շուրջ, սակայն առաջարկը հավանության չի արժանացել այն պատճառաբանությամբ, որ ճգնաժամային պայմաններում դրանք մարտական պատրաստության բերելու արագությունը կնվազի:
Հոդվածագիրը նշում է, որ ԱՄՆ-ը և Ռուսաստանն այլևս թշնամիներ չեն, և միջուկային պատերազմի կամ միմյանց նկատմամբ անակնկալ հարձակում գործելու հավանականությունը գրեթե զրոյական է:
Ներկայում ԱՄՆ-ը և Ռուսաստանն ունեն մարտական պատրաստության բերված 1800 միջուկային մարտագլխիկներ:
