Լրագրող Տաթև Դանիելյանը Eյ էլեկտրոնային պարբերականի (ejournal.am) իր բլոգում գրում է.
Ոստիկանության պաշտոնական կայքում սևով սպիտակի վրա գրված է` անձնագիրը քաղաքացուն է տրվում 5 աշխատանքային օրվա ընթացքում: Զանգեք ոստիկանության տարածքային բաժիններ: Պետը մուննաթով կասի, որ պատին փակցված է կարգը, եկեք, նայեք` 5 աշխատանքային օրվա ընթացքում անձնագիրը փոխում են: Հատուկ տարածքայինների և ոստիկանության անձնագրերի և վիզաների վարչության պետի համար եմ գրում` անձնագիրը քաղաքացուն անգամ 20 օրվա ընթացքում չեք տալիս:
Պարզաբանումը մեկն է` հիմա անձնագիր չկա: Քննարկման մեկ այլ թեմա է, թե մեր երկրի քաղաքացու գլխավոր փաստաթուղթն ինչու է այլ երկրում տպագրվում, այդ ով է որոշել նման անհեթեթություն, ինչն է խանգարում անձնագրերը Հայաստանում տպագրել: Սակայն վերադառնանք ձեր ստին, հարգելի պաշտոնյաներ: Չստել, գիտեմ, որ չեք կարող, բայց գոնե խելամտության շրջանակում արդարացրեք ձեր սուտը:
Այդ ինչպես եղավ, որ ամբողջ համակարգով չկարողացաք հաշվարկ անել ու հասկանալ, որ 2000-ականների սկզբին անձնագիր ստացած քաղաքացիները պետք է փոխեն հիմա անձնագրերը, ինչպես գլխի չէիք ընկել, որ ամռանը մարդիկ հանգստանալու են մեկնում և անձնագիրը փոխելու կարիք են ունենալու: Ով է ձեզ թույլ տվել քաղաքացուն, առանց բացատրություն տալու, ուղարկել տուն, հորդորելով 15 կամ եթե չի շտապում 25 օրից գալ անձնագրի հետևից, որը հիշեցնում եմ, ուղղակի պարտավոր եք 5 աշխատանքային օրվա ընթացքում տալ:
Լավ գոնե մի փոքր հեռատես գտնվեիք ու ընտրություններից հետո հարթեիք խնդիրը: Ինչից է, որ անձնագիրը ուշացնելուց մոռանում եք, բայց արագ ստանալու համար հիշում եք դադարեցված կարգն ու առաջարկում վճարել 10 հազար դրամ` երեք կամ 20 հազար դրամ` մեկ օրվա ընթացքում ստանալու համար: Եթե արագացված կարգով ստանալու համար անձնագիր կա, ինչից է, որ 20 օրն էլ չի բավականացնում ձեր պարտականությունները պատշաճ կատարելու համար:
Ուզում եք, որ ձեզ խնդրեն, թե կաշառեն` օրենքով սահմանված կարգով: Եվ վերջապես, բացատրեք ինձ, թե ինչու չեք ուզում գոնե ներողություն խնդրել ձեր անպատասխանատու, թափթփված և ոչ պրոֆեսիոնալ աշխատանքի համար ու պաշտոնական բացատրություն տալ թույլ տված օրինախախտման պատճառների մասին:
