Новости-Грузия-ի փոխանցմամբ՝ Վրաստանի պաշտպանության նախարությունն այսուհետ ունենալու է նոր կարգախոս ու նոր հայեցակարգ: Այս մասին երեկ Թբիլիսիում դիվանագիտական կորպուսի հետ հանդիպման ժամանակ հայտարարել է Վրաստանի նորանշանակ պաշտպանության նախարար, կրթության ու գիտության նախկին նախարար Դմիտրի Շաշկինը, որին Սաակաշվիլին օրեր առաջ բնութագրել էր որպես իսկական հայրենասեր:
Շաշկինի խոսքերով՝ «Մենք չենք լքում ոչ մի մարդու» ռեյնջերական կարգախոսը պետք է վերափոխվի «Մենք դժբախտության մեջ չենք լքի ոչ մեկին ո՛չ խաղաղ ժամանակ, ո՛չ էլ պատերազմական ժամանակ»: Այս ամենի հետ մեկտեղ Շաշկինը դիվանագիտական կորպուսի ներկայացուցիչներին ծանոթացրել է պաշտպանության նախարարության նոր հայեցակարգի հետ՝ «Երեք T-երի հայեցակարգ».
«Առաջին T-ն Total Care-ն է: Այն վերաբերում է յուրաքանչյուր զինծառայողի ու նրա ընտանիքի մասին պետական խնամքին: Երկրորդ T-ն Total Training-ն է: Սա նշանակում է բանակում կրթության մակարդակի ու գիտելիքների առավելագույն աճ՝ արագացնելու համար Վրաստանի ինտեգրումը ՆԱՏՕ-ին:
Եվ վերջապես երրորդ T-ն Total Defence-ն է: Սա նշանակում է տոտալ պաշտպանություն, ինչը կարևոր բաղադրատարր է մեր տարածքների 20 տոկոսի օկուպացման պարագայում և տոտալ պաշտպանության կարևորագույն ասպեկտը ռեզերվն է»:
