Թուրքական Anadolu գործակալության փոխանցմամբ՝ 2023 թվականին (Թուրքիայի Հանրապետության հիմնադրման 100-ամյակ) Թուրքիայում էլեկտրաէներգիայի սպառումը կրկնակի աճելու է և կազմելու 450 միլիարդ կվտ/ժամ՝ ներկայիս 229 միլիարդ կվտ/ժամի փոխարեն: Այս մասին հայտարարել է Թուրքիայի էներգետիկայի և բնական պաշարների նախարար Թաներ Յըլդըզը:
Վերջինիս խոսքերով՝ էլեկտրաէներգիայի սպառման կտրուկ աճն իրենցից պահանջում է լուրջ ներդրումներ կատարել այդ ոլորտում: Ըստ Յըլդըզի՝ խոսքը 100 միլիարդ դոլարի մասին է: Նախարարը հավելել է, որ այս տարվա հունիսին Թուրքիայում էլեկտրաէներգիայի սպառումը աճել է 11 տոկոսով՝ նախորդ տարվա հունիսի համեմատ:
Թուրքիայի էլեկտրաէներգիայի հաղորդման պետական ընկերության (TEIAS) տվյալներով՝ 2012 թվականի առաջին եռամսյակին Թուրքիայում էլեկտրաէներգիայի արտադրությունն աճել է 10.1 տոկոսով՝ նախորդ տարվա նույն ժամանակահատվածի համեմատ, և կազմել 62.9 միլիարդ կվտ/ժամ: Միևնույն ժամանակահատվածում ներկրվել է 1.19 միլիարդ կվտ/ժամ էլեկտրաէներգիա:
