Новости-Грузия-ի փոխանցմամբ՝ ԱՄՆ Ազգային ժողովրդավարական ինստիտուտը (NDI) երեկ Թբիլիսիում ներկայացրել է Վրաստանի ներքաղաքական ու արտաքին քաղաքական խնդիրների շուրջ իր անցկացրած հարցախույզի արդյունքները:
Հարցախույզն անցկացվել է հունիսի 4-22-ը ողջ Վրաստանում: Դրան մասնակցել է 6299 մարդ: Հարցախույզի մասնակիցները պատասխանել են «Վրաստանում հասարակական տրամադրվածության» մասին հարցին: Մասնակիցների ավելի քան 70 տոկոսը հայտարարել է, որ պատրաստ է մասնակցել խորհրդարանական (2012) և նախագահական (2013) ընտրություններին:
Խորհրդարանական ընտրություններին մասնակցելու պատրաստակամություն է հայտնել 75 տոկոսը (դեմ՝ 25 տոկոս), իսկ նախագահական ընտրություններին՝ 77 տոկոսը (դեմ 23 տոկոս): Ընդ որում, մասնակիցների 42 տոկոսը կարծում է, որ խորհրդարանական ընտրությունները կանցնեն քիչ թե շատ լավ, 13 տոկոսը՝ շատ լավ, 17 տոկոսի կարծիքով՝ դրանք մասամբ կեղծվելու են, իսկ 4 տոկոսը կարծում է, որ դրանք ամբողջովին են կեղծվելու: Եվս 23 տոկոսը դժվարացել է պատասխանել այդ հարցին:
Հարցախույզի մասնակիցները պատասխանել են նաև ընդդիմադիր միլիարդատեր, «Վրացական երազանք» քաղաքական կոալիցիայի առաջնորդ Բիձինա Իվանիշվիլիի շուրջ ստեղծված իրավիճակին առնչվող հարցերին: Նրանց 53 տոկոսը հայտարարել է, որ չեն աջակցի Իվանիշվիլիի կոչին, եթե նա խորհրդարանական ընտրություններից հետո հայտարարի, որ ընտրությունները կեղծվել են և պետք է սկսել փողոցային ակցիաներ: 27 տոկոսը դրական պատասխան է տվել, 2 տոկոսը հրաժարվել է պատասխանել, իսկ 19 տոկոսը պատասխանել է «չգիտեմ»:
Իվանիշվիլիին Վրաստանի քաղաքացիությունից զրկելու հետ համաձայն չէ 71 տոկոսը, դրան դրականորեն է նայում 8 տոկոսը, 17 տոկոսը պատասխանել է «չգիտեմ», 4 տոկոսը հրաժարվել է պատասխանել: Ընդ որում, մասնակիցների 76 տոկոսը տեղյակ է եղել, որ Իվանիշվիլին փորձեր է ձեռնարկել Վրաստանի քաղաքացիության վերականգնման ուղղությամբ:
Հարցախույզի մասնակիցների 49 տոկոսը գտնում է, որ Վրաստանը հիմնականում զարգանում է ճիշտ ուղղությամբ, 4 տոկոսի կարծիքով՝ դա բացարձակապես այդպես է, 14 տոկոսը կարծում է, որ Վրաստանը հիմնականում զարգանում է սխալ ուղղությամբ, 9 տոկոսի կարծիքով էլ՝ բացարձակապես սխալ ուղղությամբ: 10 տոկոսը կարծում է, որ Վրաստանն ընդհանրապես չի փոխվում, 12 տոկոսն էլ դժվարացել է պատասխանել դրան:
