Հարավային Կորեայի նախագահի ավագ եղբայր Լի Սան Դիկը այսօր վաղ առավոտյան ձերբակալվել է և տեղափոխվել բանտ: Նրան մեղադրում են կոռուպցիայի մեջ:
Դիկին ձերբակալել են Սեուլի կենտրոնական շրջանային դատարանի հրամանագրի հիման վրա: Այս մասին հաղորդում է Itar-Tass-ը` հղում անելով հարավկորեական ԶԼՄ-ներին:
Իշխող «Սենուրի» կուսակցությունից Ազգային ժողովի նախկին պատգամավոր Լի Սան Դիկը նույն կուսակցությունից գործող մեկ այլ պատգամավոր Չոն Դու Օնայի հետ միասին մեղադրվում է մի քանի խնայողական բանկերի ղեկավարներից խոշոր չափի կաշառքներ վերցնելու մեջ:
Հետաքննությամբ պարզվել էր, որ 2007-2011 թթ. ընթացքում Լի Սան Դիկը ընդհանուր 525 հազար դոլարի չափով կաշառք է վերցրել «Սոլոմոն» և «Միրե» բանկերի ղեկավարներից:
Դատախազության տվյալներով` այդ գումարները նրան են տրվել, որպեսզի երկու բանկերը խուսափեն ֆինանսական աուդիտից: Այս ամենից բացի` նա մեղադրվում է «Կոլոն» արդյունաբերական խմբի ղեկավարից ավելի քան 100 հազար դոլարի չափով կաշառք ստանալու մեջ: Նշենք, որ խումբը նախկինում նա է ղեկավարել:
«Լի Սան Դիկի հանցավոր գործունեությունը ապացուցվել է, և լուրջ հիմքեր կան` ենթադրելու, որ կասկածյալն իր կարգավիճակի և քաղաքական ազդեցության շնորհիվ կարող է փորձել ոչնչացնել վկայությունները»,-հայտարարել է դատավոր Պակ Բյոն Սամը: