Եգիպտոսում տեղի ունեցած հեղափոխությունից հետո ամենաշատը ցնծում է արաբական աշխարհը, որտեղ շատ երկրներում նույնպես գոյություն ունեն նմանատիպ ռեժիմներ և խնդիրներ:
Երեկ Մուբարաքի հրաժարականից անմիջապես հետո բազմահազարանոց հանրահավաքներ են տեղի ունեցել Լիբանանում, Եմենում, Հորդանանում, Պաղեստինում և այլ երկրներում:
Ինչպես փոխանցում է France Presse գործակալությունը, երեկ Ալժիրում կատարվել են ընդդիմադիրների ձերբակալություններ: Իշխանություններն այսպես արձագանքել են ընդդիմադիրների` երկրի մայրաքաղաքում ի աջակցություն Եգիպտոսի ժողովրդի հանրահավաք անցկացնելու մտադրությանը:
Արդեն հայտնի է, որ իշխանությունները երկրի տարբեր մասերից մայրաքաղաք են բերել լրացուցիչ զորամիավորումներ, որպեսզի կարողանան վերահսկել իրավիճակը: BBC-ի փոխանցմամբ, այսօր Ալժիրի ընդդիմությունը պատրաստվում է փողոց հանել հազարավոր մարդկանց, որոնք պահանջելու են գործող իշխանությունների հրաժարականը, երկրում արդեն 19 տարի գործող արտակարգ դրության վերացումը, ինչպես նաև իրենց ընկերների ազատ արձակումը բանտերից:
Այս հուզումները եզակի չեն Ալժիրում: Հունվարի սկզբից այստեղ բողոքի ակցիաներ են անցկացվում: Դրանք սկսել են հարևան պետություններում ակտիվության և պարենային ապրանքների թանկացման ֆոնի վրա: Վախենալով Թունիսի նախադեպից` երկրի բազմամյա ղեկավար Աբդ Ալ-Ազիզ Բութեֆլիքան հայտարարել էր, որ երկրի արտակարգ դրությունը կհանվի մոտ ապագայում:
