Այսօր՝ հուլիսի 10-ին, ՀՀ կրթության և գիտության նախարարությունում տեղի է ունեցել «Dasaran.am» կրթական ծրագրի նախաձեռնած, ՀՀ կրթության և գիտության նախարարության ու ՀՀ ոստիկանության աջակցությամբ իրականացվող «Ավտոդպրոց» ծրագրի շնորհանդեսը: Նշենք, որ ծրագրի իրականացմանը օժանդակել է նաև «Dasaran.am»-ի գլխավոր հովանավոր «ՎիվաՍել-ՄՏՍ» ընկերությունը:
Հաշվի առնելով այն, որ այսօրվա դպրոցականները մեր երկրի ապագա վարորդներն են, իսկ երթևեկության կանոններին տիրապետելն անվտանգ երթևեկության առաջին նախապայմանը, «Ավտոդպրոց»-ը նպատակ ունի բարձրացնել դպրոցականների, ինչպես նաև նրանց ծնողների և ՀՀ վարորդների՝ երթևեկության կանոնների վերաբերյալ իրազեկվածության մակարդակը: Այն հասանելի է ոչ միայն «Dasaran.am»-ում գրանցված բաժանորդներին, այլև յուրաքանչյուր քաղաքացու, ով ցանկանում է առցանց սովորել երթևեկության կանոնները:
«Ավտոդպրոց»-ի շնորհիվ ներկայիս և ապագա բազմաթիվ վարորդներ կտիրապետեն ճանապարհային երթևեկության կանոններին, և յուրաքանչյուր քաղաքացի հնարավորություն կունենա վարորդական իրավունքի տեսական քննությունից առաջ առցանց վերապատրաստվել:
«Աշակերտների շրջանում երթևեկության կանոնների իմացությունը խրախուսելու նպատակով «Dasaran.am» կրթական ծրագիրը նախատեսում է նաև անցկացնել բազմաթիվ մրցույթներ»,-ներկայացնելով ծրագիրը՝ նշեց «Dasaran.am» կրթական ծրագրի հիմնադիր Սուրեն Ալոյանը:
Շնորհանդեսին հաջորդել է մամուլի ասուլիսը, որի ընթացքում Սուրեն Ալոյանը և Կրթական տեխնոլոգիաների ազգային կենտրոնի (ԿՏԱԿ) տնօրեն Արտակ Պողոսյանը խոսել են նաև «Dasaran.am»-ի և ԿՏԱԿ-ի համագործակցության շրջանակներում հետագա ծրագրերի մասին:
