Նախագահական ընտրություններին ՀՅԴ-ն պետք է այնպես գործի, որ գործող ռեսուրսին հակադրվող մեկ այլ ռեսուրս ստեղծվի: Այսօր տեղի ունեցած մամուլի ասուլիսի ժամանակ այս մասին ասաց ՀՅԴ ԳՄ անդամ Արմեն Ռուստամյանը:
«Եթե սա մեզ հաջողվի, ընտրությունները ազատ ու արդար կանցկացվեն: Կհաջողվի՞ մեզ ստեղծել վերոնշյալ ռեսուրսը` ամեն ինչ լավ կլինի, չի՞ հաջողվի` նշանակում է, որ առաջիկա մի քանի տարիներին մեզ համար կրկին շատ դժվար է լինելու:
Մյուս կողմից էլ` ընտրողը պետք է զսպի ընտրակաշառք վերցնելու գայթակղությունը` ավելի լավ երկիր ունենալու համար: Սա ճանապարհ է, որը պետք է անցնել մինչև վերջ»,- ասաց նա:
Անդրադառնալով ՀՀԿ պատգամավոր Ռուբեն Հայրապետյանին պատկանող «Հարսնաքար» ռեստորանում տեղի ունեցած հայտնի միջադեպին, ինչի արդյունքում ռազմական բժիշկ Վահե Ավետյանը դաժան ծեծի ենթարկվելուց հետո մահացել էր, Արմեն Ռուստամյանը նկատեց, որ ՀՅԴ-ն հարցաշար է մշակում` ուղարկելու գործով զբաղվող բոլոր մարմիններին:
«Իշխանությունները միջադեպին կիսատ-պռատ արձագանքեցին: Ռուբեն Հայրապետյանը, ճիշտ է, վայր դրեց իր պատգամավորական մանդատը, բայց դա դեռ բավարար չէ: Նա կատարել է նվազագույն անհրաժեշտը: Հասարակությանը դեռ մի շարք հարցեր են հուզում: Մարդկանց համբերության բաժակը լցվել է, քանի որ երկրում գոյություն ունեն հայ քաղաքացու անպաշտպանվածություն և ամենաթողություն:
Ազգային ժողովը պետք է միջամտի «Հարսնաքարի» դեպքին, գործով զբաղվող հատուկ հանձնաժողով ստեղծի, մինչդեռ այսօր ստացել ենք չորս ընդդիմադիր ուժերի` գործընթացն ուսումնասիրելու և ԱԺ-ին հաշվետվություն ներկայացնելու հարցի առնչությամբ մեր դիմումի մերժումը»:
Լուսանկարը՝ PanARMENIAN Photo-ի
