Ռուբեն Հայրապետյանը և նրա կամակատարները պետք է փոխհատուցեն Վահե Ավետյանի ընտանիքին հասցված նյութական և բարոյական վնասը. Ռուբեն Հայրապետյանի սեփական տան մոտ իր ելույթի ժամանակ այս մասին ասաց «Սարդարապատ» շարժման անդամ, «Վահե Ավետյան» հասարակական շարժման ներկայացուցիչ Գարեգին Չուքասզյանը՝ ներկայացնելով «Վահե Ավետյան» շարժման նպատակները: Նա ներկայացրեց առաջին պահանջը, որ Ռուբեն Հայրապետյանը և նրա բոլոր կամակատարները պետք է փոխհատուցեն Վահե Ավետյանի ընտանիքին հասցված նյութական և բարոյական վնասը: Նրա խոսքով՝ նախաձեռնության նպատակներից է նաև այն, որ Ռուբեն Հայրապետյանը զրկվի քաղաքական ու հասարակական գործունեություն ծավալելու հնարավորությունից:
«Ռուբեն Հայրապետյանը օրենքի ուժով պետք է կրի իր արարքներին համարժեք պատիժ, քանի որ նա պատասխանատու է քրեածին վարքագիծ ունեցող անձանց իր թիկնազորում աշխատանքի ընդունելու և իր հանրային ելույթներով ու կենսակերպով քրեածին աշխատաոճ ձևավորելու համար: Հանրությունը պետք է հրաժարվի Ռուբեն Հայրապետյանի ընտանիքին պատկանող ընկերությունների արտադրած ապրանքներից ու մատուցած ծառայություններից»,- ասաց Գարեգին Չուքասզյանը:
Հիշեցնենք, որ երեկ «Հարսնաքար» ռեստորանային համալիրի մոտ պետք է մոմավառություն տեղի ունենար, սակայն այն չկայացավ, քանի որ ոստիկանությունը ներկաներին թույլ չտվեցին մոտենալ ռեստորանային համալիրին: Ակցիան շարունակվեց համալիրի հարևանությամբ գտնվող գլխավոր պողոտայում, որը ոստիկանությունը ցրեց՝ բիրտ ուժ կիրառելով: «Հարսնաքար» ռեստորանային համալիրի մոտ ակցիան ավարտվեց Ռուբեն Հայրապետյանի սեփական տան մոտ: Նշենք, որ ակցիաները կազմակերպված էին հունիսի 17-ին «Հարսնաքար» ռեստորանային համալիրում դաժանաբար ծեծի ենթարկված, այնուհետև մահացած Վահե Ավետյանի հիշատակին:
