Եգիպտոսի նախկին նախագահ Հոսնի Մուբարաքի որդիները՝ Ալան և Գամալը, չեն ընդունում բորսայում խարդախությունների վերաբերյալ իրենց ներկայացված մեղադրանքները:
«Այդ ամբողջը խաբեություն և զրպարտանք է»,- ասել է նախկին նախագահի ավագ որդին՝ Ալան, այսօր սկսված դատավարությանը: Գամալն էլ հայտարարել է, որ ամբողջությամբ հերքում է իր հասցեին ներկայացված մեղադրանքները:
Մուբարաքի որդիների փաստաբան Ֆարիդ Ալ-Դիբը պահանջել է դատարանի դահլիճից ազատ արձակել իր պաշտպանյալներին, քանի որ նրանց կալանքի տակ պահելու բոլոր հնարավոր ժամկետները սպառվել են: Նա հիշեցրել է, որ Ալան և Գամալը ձերբակալվել են 2012 թ. ապրիլին և մինչ այժմ կալանքի տակ են պահվում:
Բացի այդ, փաստաբանը զարմանք է հայտնել, որ իր պաշտպանյալները դեռ գտնվում են կալանքի տակ, մինչդեռ գործով մյուս մեղադրյալներն ազատության մեջ են:
Այսօր Կահիրեի քրեական դատարանը սկսել է քննել Մուբարաքի որդիների՝ Ալայի և Գամալի դեմ խարդախությունների մեղադրանքներով գործը:
Դատախազությունը Մուբարաքի որդիներին ու ևս 7 գործարարների մեղադրում է Կահիրեի բորսայում «Ալ-Բանկ Ալ-Վատան» բանկի բաժնետոմսերի վաճառքի ժամանակ խարդախությունների մեջ: Մասնավորապես հաղորդվում է, որ նրանք արտասահմանյան օֆշորներում գրանցված մատակարար ընկերությունների միջոցով մանր բաժնետերերից ձեռք են բերել բանկի բաժնետոմսերը: Դատախազությունը պնդում է, որ մեղադրյալները չեն բացահայտել տեղեկատվությունը բաժնետոմսերի վերջնական սեփականատերերի մասին, ինչը Եգիպտոսի արժեթղթերի շուկայի աշխատանքների կանոնների խախտում է: Հետաքննության կարծիքով՝ խարդախությունների արդյունքում Ալա և Գամալ Մուբարաքներն ու նրանց գործընկերները անօրինական ճանապարհով հարստացել են 2.5 մլրդ եգիպտական ֆունտով (ավելի քան 420 մլն դոլար): Ավելի ուշ այդ գումարները տեղափոխվել են արտասահմանյան հաշիվների վրա:
