Սիրիայի ընդդիմության ներկայացուցիչները հայտարարում են, որ Սիրիայի նախագահ Բաշար Ալ-Ասադը չի արձագանքում իրենց պահանջներին: Այս մասին հայտարարել է ընդդիմության պատվիրակության ղեկավար Միշել Կիլոն՝ Մոսկվայում Ռուսաստանի արտգործնախարար Սերգեյ Լավրովի հետ ունեցած հանդիպմանը:
Ինչպես հաղորդում է RIA Novosti-ն, Կիոն տարբեր ժամանակներում եղել է ինչպես ներքին, այնպես էլ արտաքին ընդդիմության կազմում: Վերջին շրջանում նա ապրում է Փարիզում:
«Սիրիան դարձել է միջազգային հակամարտության թատերաբեմ: Մենք՝ որպես ժողովրդավարական ուժերի ներկայացուցիչներ, կարծում ենք, որ Ռուսաստանի շահերից է բխում դրության կարգավորումը: Մենք ազգային երկխոսության մեջ կողմեր ենք հանդիսանում 2001 թվից: Ցավոք, վարչակարգը չի պատասխնաում մեր պահանջներին»,- ասել է Կիլոն:
Իր հերթին, Ռուսաստանի արտգործնախարար Սերգեյ Լավրովը նշել է, որ այսօրվա հանդիպումը մեկ քայլ առաջ կլինի Ժնևի կոնֆերանսում ձեռք բերված պայմանավորվածություններն իրականացնելու պայմանները մշակելու ճանապարհին:
«Ռուսաստանն այն քիչ երկրներից է, եթե ոչ միակ երկիրն է, որն ակտիվ աշխատում է և՛ Սիրիայի կառավարության, և՛ տարբեր ընդդիմադիր կողմերի հետ՝ հասնելով Անանի ծրագրի իրագործմանը: Հույս ունենք, որ այսօրվա հանդիպումը մեկ քայլ առաջ կլինի Ժնևի կոնֆերանսում ձեռք բերված պայմանավորվածություններն իրականացնելու պայմաններ մշակելու ճանապարհին»,- ասել է Լավրովը:
