Հյուսիսային Կորեայի առաջնորդ Կիմ Չեն Ունը իր պապի՝ Կիմ Իր Սենի մահվան հիշատակին նվիրված հանդիսավոր միջոցառմանը ներկայացել է 20-30 տարեկան անհայտ մի կնոջ հետ: Ինչպես հաղորդում է Agence France-Presse-ը, այդ կադրերը ցուցադրել է երկրի պետական հեռուստաալիքը:
Կինը Կիմ Չեն Ունի հետ երևացել է հուլիսի 8-ին հանդիսավոր արարողության ժամանակ: Բացի այդ, նա Հյուսիսային Կորեայի առաջնորդին ուղեկցել է հուլիսի 6-ին տեղի ունեցած համերգին: Ինչպես հաղորդում է The Hankioreh-ը, Հարավային Կորեայի կառավարությունը ենթադրում է, որ կինը ինչ-որ կապ ունի համերգի կազմակերպման հետ:
Սակայն հարավկորեական ԶԼՄ-ները ենթադրում են, որ նա կա՛մ ԿԻմ Չեն Ունի կրտսեր քույրն է՝ Կիմ Յո Չենը, կա՛մ նրա կինը կամ սիրուհին:
Korea JoongAng Daily պարբերականը, վկայակոչելով Հարավային Կորեայի հետախուզության աղբյուրը, հայտնում է, որ Կիմ Չեն Ունի ուղեկցորդուհին հյուսիսկորեացի երգչուհի Հյոն Սոն Վոլն է եղել: Նա հայտնի է եղել մինչև 2006 թ., սակայն հետո անհետացել է ԶԼՄ-ների տեսադաշտից: 2012 թ. մարտին հյուսիսկորեական հեռուստաալիքները նրան ցուցադրել են հղիության ուշ շրջանում: Հյոն Սոն Վոլն ամուսնացած է, սակայն մամուլում լուրեր են պտտվում, որ նա սիրավեպ ունի Կիմ Չեն Ունի հետ:
Պաշտոնական մեկնաբանություն հարավկորեական հետախուզությունը հրաժարվել է անել:
Ավելի վաղ հաղորդվում էր, որ Կիմ Չեն Ունի հետ մի կնոջ են տեսել (չի նշվում՝ նույն կինն էր, թե այլ մեկը) Կիմ Չեն Իրի գերեզմանի մոտ 2011 թ. դեկտեմբերին:
Կիմ Չեն Ունի անձնական կյանքի մասին մինչ այժմ ոչինչ հայտնի չէ: Որևէ տեղեկություն չի հաղորդվում նաև նրա կրտսեր քրոջ՝ Կիմ Յո Չենի գտնվելու վայրի մասին:
