Դրամ-դոլար փոխարժեքի ներկայիս տատանումներին հուլիսին կլինի հակակշիռ՝ պայմանավորված գյուղատնտեսական աշխատանքների և զբոսաշրջային շրջանով: Ինչպես այսօր ասուլիսում հայտարարեց «Այլընտրանք» հետազոտական կենտրոնի ղեկավար Թաթուլ Մանասերյանը, արտաքին ազդակները որոշիչ բացասական ազդեցություն չեն ունենա տնտեսության առաջընթացի վրա, և հուլիսի կեսերից սկսած` այդ միտումներն իրենց ավելի զգացնել կտան, եթե ցնցումներ չլինեն:
Թ. Մանասերյանը նշեց, որ այս կիսամյակի ցուցանիշները թույլ են տալիս եզրակացնելու, որ 7% աճը համեստ կլինի` հավելած նաև առաջին եռամսյակում հանքարդյունաբերության ոլորտի 32% աճը, եթե քիչ ավելի հանդարտ տեմպերով ու կայուն կերպով շարունակվի, արտահանման վրա դրականորեն կազդի: Նա նաև հույս հայտնեց, որ վերջապես դրական տեղաշարժ կգրանցվի շինարարության ոլորտում:
Դրամի արժեզրկումը, ըստ Թ. Մանասերյանի, դրական կերպով կազդի արտահանման ծավալների վրա, սակայն` եթե ապրանքները լինեն մրցունակ. «Նորմալ սպառողը նույնիսկ ձրի չի վերցնի այն ապրանքը, որը որակյալ չէ»:
Տնտեսագետի խոսքով` 2012 թ.-ը ևս համարվում է պարենային ճգնաժամային տարի, և դա չի կարող շրջանցել հացահատիկի շուկան: Նա մտահոգություն հայտնեց երկրի պետական պաշարների (հաց, հացամթերք, նավթ, նավթամթերք, գազ) հետ կապված: Թ. Մանասերյանի բնորոշմամբ՝ գյուղատնտեսության զարգացման հարցում «կրիայի քայլերով ենք առաջ գնում», մշակովի տարածությունների կեսից ավելին դեռ չեն մշակվում, սակայն կարելի է բեկում մտցնել, իսկ դրա համար պետք է շատ ավելի վճռական լինել:
